Göyçayda ev külə döndü, amma “Quran” yanmadı (Foto)
Göyçay rayonunda ikimərtəbəli yaşayış evi yanaraq külə dönüb! Lent.az-ın məlumatına görə hadisə Göyçay şəhərinin Zakir Nəcəfov
küçəsindəki 33 saylı ünvanda yaşayan 1961-ci il təvəllüdlü Şəfiyev İsa
Mustafa oğluna məxsus fərdi yaşayış evində baş verib. Gecə saat 4:00
radələrində baş verən yanğının söndürülməsi üçün əraziyə 3
yanğınsöndürən maşın və canlı qüvvə cəlb edilib. Hadisə zamanı ümumi
sahəsi 360 kvadratmetr olan iki mərtəbəli 7 otaqlı ev tamamilə yanaraq
yararsız hala düşüb. Yanğın zamanı 3 ailəyə məxsus ev və geyim əşyaları
tamamilə yanıb və ümumilikdə 100 min manata yaxın maddi ziyan dəyib.
Hadisə zamanı evdə yatmış olan 8 ev sakini bir təhər qaçaraq yanğından
canlarını qurtarıb. Ev sahibi hadisə barədə gec xəbər tutduğu üçün rayon
yanğından mühafizə hissəsinə də vaxtında məlumat verə bilməyib. Dörd
metr aralıda yerləşən 2 qonşunun evi isə yanğından mühafizə olunub.
Hadisə zamanı evlə bərabər bütün əşyaların yanmasına baxmayaraq, möcüzə
nəticəsində şkafdakı 15-ə yaxın "Qurani Kərim”, hədis və digər dini
kitablar yanmayıb. Ev sakinlərinin hamısı ibadət əhlidir və müqəddəs
kitabların yanmaması hadisə şahidlərini və rayon sakinlərini
heyrətləndirib.
Hadisəyə elektrik naqillərində baş verən qısaqapanmanın səbəb olduğu bildirilir.
Göyçay rayonunda ikimərtəbəli yaşayış evi yanaraq külə dönüb!
