Deyerler.org:
Xəbər verildiyi kimi, Dini Qurumlarla İş üzrə Dövlət Komitəsinə yeni
sədr təyin edilməsi haqqında sərəncam imzalanıb. Sabiq sədr Hidayət
Orucovun əvəzinə Elşad Hüseyn oğlu İskəndərov Azərbaycan Respublikasının
Dini Qurumlarla İş üzrə Dövlət Komitəsinə sədri təyin olunub. Xəbəri şərh edən DEVAMM sədri Hacı İlqar İbrahimoğlu bildirmişdir :
"Bununla bağlı ilk öncə onu qeyd etmək lazımdır ki, son illərdə
ölkəmizdə din sahəsində siyasət ən yarıtmaz hala gəlib çatmışdı. Rafiq
Əliyev dönəmindən başlayaraq, müəyyən bir qeyri-peşəkarlıqla
səciyyələnən və bolşevik üslublu yanaşmanın əsası qoyulmuşdur. Əfsus
olsun ki, Hidayət Orucovun Komitəyə rəhbərliyi dönəmində bu sahədə
vəziyyət özünün ən pis səhifələrini yaşamışdır. Belə ki, məscidlər
"qanunsuz tikili" adlandırılaraq sökülmüş, bir neçə məscid bağlanmış,
zaman-zaman azana qadağa cəhdləri edilmiş və ən nəhayət, orta
məktəblərdə hicaba məhdudiyyətlər tətbiq edilmişdir. Təəsüflər
olsun ki, öncəki komitə sədrləri bu dövrlərdə nəinki inanclıların
haqlarının təmini ilə məşğul olmuş, əksinə - çeşidli qeyri-qanuni,
qeyri-hüquqi hərəkətlərlə ən loyal inanclıları belə narazı insanlara
çevirməkdə xüsusi rol oynamışlar. Əfsuslar olsun ki, inanc kimi
sahənin bütün incəliyinə etina etməyərək, insanların hisslərini
aşağılayaraq, Komitə məsulları repressiv yanaşmanı öz fəaliyyətlərinin
sərlövhəsi seçmişlər. Əsas vektoru senzuraya, qadağalara,
qanunvericiliyin sərtləşdirilməsi təşəbbüslərinə vermişlər. Bu müddət
ərzində inancla bağlı inzabati xətalar hətta cinayət təqibinin belə
predmeti olmuş, Cinayət Məcəlləsinə dini sahə ilə bağlı çoxsaylı əlavə
və düzəlişlər edilmişdir. Paradoksal hal budur ki, bu dönəmlərdə
hətta QMİ sədri Hacı Allahşükür Paşazadənin də belə, göstərilən
mövzularla bağlı fikirləri tam etinasızlıqla qarşılanırdı. Sanki dini
sahədə Sovet dövrünün bolşevik ənənələri bərpa edilmişdi. Bu mənada belə bir Komitə sədrinin kənarlaşdırılmasını müsbət hal kimi dəyərləndirməyə bilmərik. Bununla
yanaşı onu da qeyd etməliyik ki, belə bir məsuliyyətli dönəmdə Elşad
İskəndərov kimi din siyasətinə kifayət qədər yaxşı bələd olan, ölkə və
dünya miqyasında təcrübəli peşəkar kimi tanınan, İslam identikliyini
qorumaqla müasir nailiyyətləri özündə cəmləşdirməyə müvəffəq olan bir
kadrın Komitə rəhbərliyinə gətirilməsi - tərəfizimidən müsbət
dəyərləndirilir. Ümid edirik ki, İKT kimi nüfuzlu qurumda olan iş
təcrübəsini, dünyanın yeni çağırışlarını kifayət qədər özündə toparlayan
bir insan kimi, E.İskəndərov öncəki dönəmdə buraxılmış bütün
yanlışlıqları təhlil edərək, öz fəaliyyətində inanclı insanların dini
etiqad azadlığının tam təmininə, bunun da nəticəsində dövlətçiliyimizin
sütunlarının möhkəmləndiliməsinə nail olacaqdır. Eyni zamanda
ölkədə inancla bağlı yaranmış bu ağır dönəmdə Allah və Vətən qarşısında
tarixi məsuliyyətini dərk edərək, ümid edirik ki, yeni rəhbərlik
yığılmış problemlərin cözümündə operativlik göstərəcək və bu sahədə
müsbət dəyişikliklərə rəvac verilməsinə nail olacaqdır. Bununla yanaşı,
din sahəsində yanlış siyasətin nəticəsində meydana çıxmış
repressiyalara son qoyulması, həbsə günahsız atılmış inanclıların təcili
azadlığa buraxılması - inanc mühitinin ən ümdə gözləntiləri
sırasındadır. Nəhayətdə, bütün bu müsbətliklər sayəsində ümidvarıq
ki, onsuz da çətin geopolitik və tarixi dönəmini yaşayan Vətənimizin
enerjisi lazımsız məsələlərə sərf olunmaz, qarşısında Qarabağın
azadlığı kimi İlahi bir missiya duran inanclı kəsimin ruhiyyəsi
zədələnməz, nəticədə dövlətimiz dünyada, xüsusən də İslam ölkələri
arasında özünün ən layiq olduğu yeri tutmağa müvəffəq olar. Uca
Allahdan bu mübarək Rəcəb ayında bütün xalqımıza, xüsusən də inancla
bağl məsuliyyət daşıyan insanlara mənəvi tofiqatlar diləyirik". /Deyerler.org/
|