Bu gün 06 may 2011-ci ildə "Hicaba Azadlıq” aksiyasında həbs olunan Çingiz Novruzov azadlığa buraxılıb!
Azadxeber.az saytının müxbirinin verdiyi xəbərə görə, hicab məhbusu
Çingiz Novruzov saat 18-də Ramana qəsəbəsində yerləşən Ədliyyə
nazirliyinin 16 saylı cəza çəkmə müəssisəsində çoxsaylı inanclıların
intizarına son qoyaraq azadlığa qovuşdu.
Müxbirimizin hazırladığı müsahibəni sizlərə təqdim edirik: -Hicab məhbusu olmağınla fəxr edirsənmi? -Bəli, fəxr edirəm və adla da fəxr hissi duyuram. Bundan sonra da mübarizə aparacağıq.
-Siz həbsxanada olduğunuz zaman təzyiqlər olunubmu?
-Xeyir. İçəridə vəziyyətimiz çox yaxşı idi. Bütün qardaşların hamısı
yaxşıdırlar və hamısının sizə salamı var. Başda ruhanimiz Hacı Tale
olmaqla hamı dua edir. Fürsətdən istifadə edib bir il bir ay müddətində
bizə görə narahat olan və əziyyətimizi çəkən bütün bacı-qardaşlarımıza
təşəkkürümü bildirirəm. Bundan sonra da inanırıq ki, hicaba qoyulmuş
qadağaya ən azından bu şəkildə öz etirazlarını bildirəcəklər.
-Məhbəs həyatından sonra öz həyatını necə davam etdirəcəksən?
-Ruhiyyəmiz zindana düşməmişdən əvvəl bir idisə, indi bu ruhiyyə birə
yüz artdı. Biz həmişə İmam Hüseynin (ə) məktəbinin şagirdləri
olmağımızla fərəh duyuruq. Bundan sonra nəinki hicaba qoyulmuş qadağa,
İslamın dəyərlərinin qorunması üçün malımız və canımızla mübarizə
aparmağa hazırıq.
-Məhbəsdə olan digər hicab məhbuslarının vəziyyətləri necədir?
-Çox yaxşıdır. Hətta onlara oxunan hökmlərin müddəti onları heç narahat
etmir. Onlar 15 il və hətta ömürlük olsa belə zindanda olmağa
hazırdılar. Təki hicab məsələmiz həll olunsun.
-Zindanda hicab məhbusları ilə digər məhbuslar arasında münasibət necə idi?
-Münasibətlər çox gözəl idi. Biz hicab məhbusları kimi zindana
gətiriləndə 10 nəfər namaz qılan var idisə, başda ruhanimiz Hacı Taleyin
köməkliyi ilə indi onların sayı bir neçə dəfə çoxaldı. Hətta gündəlik
camaat namazları iki dəfə qılınırdı. Camaat namazı üçün artıq yer tapmaq
olmurdu. Hətta digər maddələrlə həbs olunan məhbuslar deyirdilər ki,
kaş biz də sizin kimi hicab uğrunda həbs olnardıq.
-Son olaraq nəyi qeyd etmək istəyirsiniz?
-Bütün qardaşlara və bacılara sözüm budur ki, zindan heç də qorxulu
deyil. İnsan var azadlıqda zindandadır, insan var zindanda azadlıqdadır.
Nə qədər ki, hicab qadağası həll olunmayıb biz yenə də etiraz edib
zindana düşməyə hazırıq.
islamazeri.az
|