.

İraqdakı "Mehdi Ordusu"nun lideri Seyid Müqtəda əs-Sədr, Türkiyə-İraq əlaqələrindəki gərginliyi "məzhəb oyunlarının aparıldığı mərhələ" kimi dəyərləndirib. Sədr, məzhəb fərqliliklərin yaxşı münasibətlərin yaranmasına maneə törətməməsi lazım olduğunu vurğulayıb.

 "Hürriyet”in verdiyi xəbərə görə, Sədr, Nəcəf şəhərindəki evində Türkiyənin Cəfəri cəmiyyətinin lideri Səlahəddin Özgündüzün başçılıq etdiyi nümayəndə heyətini qəbul edib. Görüşdəki çıxışında Türkiyə-İraq əlaqələri haqqında danışan Sədr, iki ölkənin əlaqələrinin məzhəb əsaslı bəzi problemlər qarşısında imtahan verdiyini vurğulayıb: "İraqda şiələrin, Türkiyədə də sünnilərin olduğunu hamı bilir. İraqı yalnız şiələrin, Türkiyəni də yalnız sünnilərin ölkəsi olaraq görmək səhv anlayışdır”.

Sədr, Özgündüzə Aşura günündə təşkil etdikləri tədbirlər üçün təşəkkür edərək deyib: "Bu etdikləriniz, Türkiyənin içindəki bütün dinlərin, məzhəblərin və irqlərin bərabər şəkildə fəaliyyət göstərdiyinin sübutudur”.

Türkiyənin Bəsrə konsolluğu qarşısında təşkil edilən aksiyada türk bayrağının yandırılmasını xatırladan Müqtəda əs-Sədr, bu hadisənin Türkiyə və İraq xalqları arasındakı əlaqələrə mənfi təsir etdiyini söyləyib: "Bəsrədəki aksiyalar iki xalqın bir-birindən uzaqlaşdıracaq və şəraiti gərginləşdirəcək xarakterdədir. Türkiyə bayrağından əvvəl də İordaniya bayrağı yandırılmışdı. Bu qəbul edilə bilməz. Müsəlman ölkələrin bayrağının yandırılması çox çirkin bir hərəkətdir". (SalamNews)