Bugün MSD-də Hz. Əlinin (ə) doğum günü münasibətilə tədbir keçirildi!
Müqəddəs İslam dininin layiqli
şəxsiyyətlərindən olan, Hz. Muhəmməd Peyğəmbərin əmisi oğlu, kürəkəni və
ən yaxın köməkçisi sayılan Hz.Əlinin (ə) bu aya təsadüf edən mövludu
"Mənəvi Saflığa Dəvət” İctimai Birliyində təntənəli şəkildə qeyd olunub. Hicri-Qəməri
təqvimi ilə Rəcəb ayının 13-ü, Müqəddəs Kəbə evində dünyaya gələn Hz.
Əli hələ uşaq ikən İslam dini ilə tanış olmuşdu. Hz. Peyğəmbərin evində
onun himayəsi altında yaşayan Hz. Əli İslam dininin ilk zühur çağından
bu dinə qədəm qoymuşdu. Hətta "yaxın qohumlarını qorxut” ayəsi gəldikdə
İslam Peyğəmbəri bütün qohumlarını yığıb Allahın dəvətini onlara
çatdırdığı və onlardan "Sizlərdən kim mənim dəvətimi qəbul edib mənim
köməkçim olacaq” deyə soruşduğu zaman Peyğəmbərin çağırışına ilk səs
verən də məhz 13 yaşlı Hz. Əli olmuşdu.
Daha sonralar İslam
Peyğəmbərinin bütün anlarında, istər xoş, istərsə də dar günlərində hər
zaman onun yanında olmuş, onu müdafiə etmiş, hətta Peyğəmbər Məkkəni
tərk etdiyi zaman süi-qəsddən qorumaq, Hz. Muhəmməd peyğəmbərin Məkkədə
olmadığını bildirməmək üçün öz həyatını təhlükəyə ataraq onun yerinə
yatağa uzanmışdı.
Allahın dinini yaydıqları üçün Məkkə böyükləri
tərəfindən müsəlmanlara qarşı başladılan sürgünlərdə, müharibələrdə,
iqtisadi embarqolarda hz. Əli daim Hz. Peyğəmbərin və möminlərin yanında
olmuş və hər bir şəkildə onları müdafiə etmişdir. Xüsusən də döyüşlərdə
təkrarolunmaz qəhrəmanlıqlar göstərməsi, sərkərdə kimi ad çıxarması
bütün zamanlar üçün onu qəhrəmanlıq nümunəsinə çevirmişdir.
Həmçinin
Hz. Əli daim Peyğəmbərimizin yanında olduğu üçün İslam dinini ən kiçik
təfərrüatlarına qədər mənimsəmişdir. Hətta Hz. Peyğəmbərin vəfatından
sonra islam ümməti bütün elmi məsələlərdə onu müraciət edəcəkləri elm
qapısı kimi tanımışlar.
"Mənəvi Saflığa Dəvət” İctimai Birliyinin ofisində
belə bir nümunəvi şəxsiyyətin mövlud bayramına gələn qonaqlar arasında
"Əzhər” Ərəb dili tədris Mərkəzinin rəhbəri Məhəmməd Əmin Rəhimov və
həmin mərkəzin müəllimləri də iştirak edirdilər. Tədbirdə ilk söz
Məhəmməd Əmin Rəhimova verildi. O, çıxışında Hz. Əlinin Qurani-Kərim və
Peyğəmbər süünəsini layiqcə yaşamasını və bu yolu layiqincə qoruyub
təbliğ etməsindən danışdı.
Həmçinin Hz. Əlinin öz davamçılarını
onun getdiyi yola layiq olmaqda çoxlu cəhd və məsuliyyət nümayiş
etdirməyə çağırdığını da qeyd etdi. "Müsəlman adı və sifəti, mömin
adı və sifəti ayrı-ayrı xüsusiyyətlərdir. "La ilahə illəllah, Muhammədun
rəsulullah” deyən müsəlmandır, lakin, "müsəlman-başqaları onun dilindən
(əziyyətindən) və əlindən (şərrindən) amanda olandır” fərqlidir. İmanın
rüknlərini qəbul edən mömindir, lakin, "qonşusu ac ikən özü tox yatan
mömin deyildir” fərqlidir. Kimlik və xüsusiyyət fərqi Peyğəmbərdən (s)
sonra İmam Əlidə (ə) çox gözəl və ali şəkildə təcəlli etmişdir. ”
M. Rəhimov çıxışında Hz. Əlinin İslam qardaçlığını, müsəlman vəhdətini qorumaq üçün göstərdiyi fəkadarlıqlara da toxundu. "Misir
xalqına yazdığı məktubda da sükut etməyinin səbəbini izah etmişdir. Mən
heç güman etmirdim ki, ərəblər xilafəti Peyğəmbər ailəsindən alıb bizi
bu işdən çəkindirərlər, öz əllərini başqası üçün beyətə uzadarlar. Bu
səbəbdən mən də bu işdən əl götürdüm. Gördüm ki, bir qrup insanlar
İslamdan uzaqlaşdılar. Həzrət Mühəmmədin (s) dinini məhv etmək
istədilər. Qorxdum ki, İslamın və müsəlmanların köməyinə tələsməsəm,
İslamın təməlini uçmuş və viran olmuş görəm ki, mənim üçün bundan ağır
və müsibətli hal yoxdur. Mənim üçün İslamın mövcudluğu bir neçə günlük
hakimiyyətdən daha üstündür. Bunun üçün mən müsəlmanların köməyinə
qalxdım və batil məhv oldu. Sülh və əmin-amanlıq yenidən bərqərar oldu.”
Daha
sonra "Əzhər” Ərəb dili tədris Mərkəzinin müəllimi Pərviz Qəhrəmanlı
Hz. Əlinin kəlamlarının yer aldığı "Nəhcül-Balağə” kitabından Həzrətin
Quranla bağlı buyurduqları kəlamları oxuyaraq bu kəlamların günümüzlə
sıx olan əlaqələrindən, İslam dinin sütunu olan Qurani-Kərimə layiqli
münasibətin əslində necə olmasından danışdı. Allah Rəsulunun, onun
Əhli-Beytinin və sahəbələrinin Qurani-Kərimə olan münasibətini ideal
olaraq götürülməsinin zərurət olduğunu qeyd edən natiq bugün müsəlman
toplumunda Qurani-Kərimə qarşı diqqətin azalmasını da mənfi hal kimi
qiymətləndirdi. P.Qəhrəmanlı Hz. Əlinin böyüklüyünü onun Qurani-Kərimə
olan sadiqliyi ilə əsaslandıraraq hər bir müsəlmanın da bu işdə o həzrət
kimi olmasını və hər gününün heç olmazsa az bir hissəsini belə
Qurani-Kərimin öyrənilməsinə sərf etməsini tövsiyyə etdi.
Tədbirin sonunda tədbir iştirakçıları arasında viktorina keçirildi./manevisafliq.com/
islamazeri.az
|