İslam dinini Qərbə izah etməyin zamanının çoxdan gəldiyini bildirən
Kəşmiri, bunun üçün məntiqli hərəkət edilməli olduğunu və İslamı
doğru-düzgün şəkildə çatdırmaq üçün yalnız Əhli-Beyt məktəbindən
faydalanmağın zəruriliyini önə çəkib. Höccətül İslam Seyid Kəşmiri,
Ayətullah Sistaninin sadə həyatı, hadisələr mövzusundakı dəqiq
təhlilləri, beytülmal mövzusundakı həssaslığını nümunə olaraq göstərib.
Ayətullah Sistaninin gənclərə tövsiyəsinin iman, elm, elm əhli ilə
ünsiyyətdə olmaq, xalqa qarşı şəfqətli olma və ana dilinin qorunmasının,
olduğunu bildirən Kəşmiri islam dininin təbliğində bunların önə
çəkilməli olduğunu qeyd edib. Onun sözlərinə görə, hazırda Əhli-Beyt
məktəbinin tanıdılması üçün hər hansı maneə yoxdur. Digər məzhəb
mənsubları ilə şiələrin arasında da hər hansı bir ixtilafın olmadığını
deyən Seyid Kəşmiri bəzi mətləblərə aydınlıq gətirib.
"Bəzi qruplar və İslam düşmənləri şiələrin bu cür yüksəlişini təxmin
edə bilmirdilər. Nəcəfin mövqeyinin yox olacağını düşünürdülər. Halbuki
Ayətullah Sistaninin vücudu Nəcəfi qorudu. Şiənin mövqeyini zəiflədə,
yüksəlişinin qarşısına ala bilməyəcəklərini görəndə isə düşmənlər bu
dəfə də əllərindən gələn hər cür əxlaqsız yola müraciət etməyə
başladılar. Şiənin dini mərciyyət mövqeyinin təsirini azaltmaq üçün
böhtan və qarayaxma kampaniyasına başladılar. Lakin buna da nail ola
bilmədilər.
"İngiltərə, Amerika, Almaniya, İsveçrə, Hollandiya başda olmaqla bütün Avropada mərkəzlərimiz var”
Eyni zamanda "Avropa İmam Əli (ə) Müəssisəsi”nin də rəhbəri olan
Seyid Kəşmiri, İngiltərədə "İmam Əli (ə)" "İmam Həsən (ə)" və "İmam
Cavad (ə)" müəssisələrini açdıqlarını yaxında İmam Rza (ə) mərkəzinin də
açılışını edəcəklərini söyləyib. Avropa və Amerikadakı digər mərkəzlər
haqqında da məlumat verən Kəşmiri deyib ki, Hollandiyada "Əl-Küfə"
təhsil araşdırma mərkəzi, İsveçrədə mədəniyyət mərkəzi, Amerikada "İmam
Mehdi" müəssisəsi fəaliyyət göstərir. Bundan başqa Almaniyada
mədəniyyət və təhsil mərkəzləri var ki, burada əsas hədəf islam dininə
və insanlara xidmət etməkdir.
"Ayətullah Sistaninin cəmi iki paltarı var”
Seyid Kəşmiri Ayətullah Sistaninin beytülmaldan əsla istifadə
etmədiyini sadə bir həyatı olduğunu söyləyib: "Ayətullah Sistaninin
illərdir cəmi iki ədəd ruhani paltarı var, israf mövzusunda çox
həssasdır. Londona göz əməliyyatı üçün gələndə beytülmaldan
xərclənməsinə əsla icazə vermədi. Kiçik bir yer kirayəyə götürdük, orada
ziyarətçilərini qəbul etdi. Xüsusilə gənclərin Avropada yeni
texnologiya öyrənərək öz ölkələrinə faydalı olmaları mövzusunda
tövsiyələri oldu."
"Əvvəlcə Qum və Nəcəfdəki bütün fəqihlərə ev alın sonra növbə mənə çatanda düşünərik”
Ayətullah Sistaninin yaşadığı kiçik evi haqqında da məlumat verən
nümayəndəsi bunları deyib: "Bir imkanlı şəxs Ayətullah Sistaniyə
yaşadığı evin çox köhnə və kiçik olduğunu və icazəsi ilə ona yeni ev
almaq istədiyini deyib. Lakin Ayətullah Sistani bu təklifi qəbul
etməyərək Qum və Nəcəfdəki fəqihlərin hamısına ev ala bilsə ondan sonra
özünə növbə çatanda düşünə biləcəyini deyib. Ayətullah Sistaninin özünün
evi yoxdur. Olanlarının da hamısı vəqf edilmiş yerlərdir."
Ayətullah Sistaninin uşaqları haqqında da danışan Seyid Kəşmiri, onun
övladlarının saleh və alim insanlar olduğunu, xüsusilə büro məsulu
böyük oğulu Seyid Məhəmməd Rzanın Ayətullah Xoyinin tələbələrindən
olduğunu, ali səviyyə ictihad və fiqh dərsləri verdiyini söyləyib.
islamazeri.az