İmam Əli (ə) buyurur: "O zamandan ki, Peyğəmbər (s) vəfat etmişdir,
daima məzlum olmuşam”. Bir gün bir ərəb Həzrət (ə) çıxış edən zaman
fəryad çəkir ki, mən məzlumam. İmam (ə) onu yanına çağıraraq, buyurur:
"Sənə bir dəfə zülm edilmişdir, ancaq mənə kəsək və tük qədər zülm
edilmişdir”. Burada kəsək dedikdə Həzrət daşı nəzərdə tuturdu, tük
dedikdə isə heyvanların tükünün sayını nəzərdə tuturdu.
İmam Əlinin (ə) məzlumiyyəti birtərəfli deyildi. Bəlkə hər tərəfdən
İmamı (ə) məzlum halına salmışdılar. Bu məzlumiyyətin səbəblərindən biri
insanların Peyğəmbəri-Əkrəmin (s) o Həzrətin məqamına qoyduğu dəyəri
qiymətləndirə bilməməkləri idi. Bu məzlumiyyət Həzrətdən başqa onun
ətrafındakılara və Əhli-beyt (ə) davamçılarına qarşı da həyata
keçirilirdi. Tarix boyunca da görürük ki, Əhli-beytin (ə) düşmənləri
daima onlara iftira atmış və töhmətlə günahlandırmışdılar. Çox təəsüf
ki, bu məsələ indiyə qədər də davam edir.
Qurani-Kərim insanı iki halda görür. Biri Allahın, Peyğəmbərin(s) və
İmamların (ə) rəhbərliyi altında. "Allah iman gətirənlərin dostu və
başçısıdır. Onları (nadanlıq, küfr və itaətsizliklik) qaranlıqlar(ın)dan
(elm, iman və təqva) nur(un)a tərəf çıxarır”. ("Bəqərə” 257).
İkinci dəstə isə od əhlinin rəhbərliyi altında. Belə ki, Allah buyurur:
"Kafir olanların başçıları isə azğın və itaətsizlərdir ki, onları
(hidayət) nur(un)dan (azğınlıq) zülmətlər(in)ə tərəf çıxarırlar. Onlar
Cəhənnəm əhlidirlər və orada əbədi qalacaqlar”. ("Bəqərə” 257).
Həmçinin rəhbər də ya nur İmamıdır, ya da od imamı. Ya gərək nur İmamı
tərəfindən hidayət olunaq, ya da zəlil "imam”ın əlində bədbəxt olaq.
Quran nur İmamı haqqında buyurur: "Onları (yaşadıqları cəmiyyəti) Bizim
əmrimizlə doğru yola yönəldən rəhbərlər etdik və onlara xeyir işlər
görməyi, namaz qılmağı və zəkat verməyi vəhy etdik. Onlar yalnız Bizə
ibadət edirdilər”. ("Ənbiya” 73).
Fironçular haqqında isə Quran belə buyurur: "Biz onları (küfr və
tüğyanları ilə gələcək nəsilləri) (Cəhənnəm) od(un)a sarı çağıran
rəhbərlər etdik. Qiyamət günü (heç bir şəfaət sahibi tərəfindən) onlara
kömək edilməyəcək! Bu dünyada onların ardınca (böyük) bir lənət qoyduq.
(Mələklərin və möminlərin lənəti, bu cür şəxslərə tabe olanların
günahları onlar üçün həqiqi lənətdir.) Qiyamət günü (onlar) eybəcər
üzlülərdən, rüsvay edilmişlərdən və mənfurlardan olacaqlar”. ("Qəsəs”
41-42).
Hədislərimizdən də belə nəticəyə gəlmək olur ki, ancaq o insanın əməli
qəbul olunur ki, haqq İmamın davamçısı olsun, Allahın əmrinə itaət
etsin, istəklərini Allahdan qabağa salmasın. Quranın nəzərində o kəs
bağışlanmağa layiqdir ki, Allahın əmrinə itatə etsin və İmamların
davamçısı olsun.
İbni Abbas Qiyamət səhnəsini belə təsvir edir: "Peyğəmbər (s) buyurur:
Qiyamətin sabahısı mən... qardaşım, əmim oğlu və kürəkənim Əli bini
Əbitalib behişt dəvələrindən birinə minəcəyik. Əlində həmd bayrağı
olacaqdır. Minik üzərində məhşərə daxil olacağıq. Yanından keçdiyimiz
mələklər belə deyərlər: "Bu Allaha yaxın mələkdir, ya göndərilmiş
peyğəmbərdir, ya Allah ərşinin himayəçisidir”. Bu zaman Allah ərşindən
belə nida gələr: "Bu şəxs nə Allaha yaxın mələkdir, nə göndərilmiş
peyğəmbər, nə də ərşin himayəçisidir. Bu Əli ibn Əbitalibdir ki,
Əmirəl-möminin, dindarların rəhbəri və dünyanın ağüzlülərinin
rəhbəridir. Hər kim onu təsdiq edərsə, xilas olunar və kim ki, onu inkar
edər, ziyan görər””.
İbni Məsud deyir: "Peyğəmbər (s) Zeynəbin (Həzrətin həyat yoldaşlarından
biri) evindən Ummi Səlimənin evinə gedir. Bir müddətdən sonra Həzrət
Əli (ə) gəlir. Peyğəmbər (s) buyurur: "Ey Ummi Səlimə! Əlidir, onu dost
bil. Əti mənim ətimdən, qanı mənim qanımdandır və o, mənim elmimin
xəzinəsi, sabahın qulağıdır. Şahid ol və şəhadət ver ki, nakisinlərin,
qasitinlərin və mariqinlərin qatili məndən sonra odur. Düşmənimin belini
sındıracaq və sünnətimi dirçəldəcəkdir. Əgər hansısa bəndə
Məscidul-həramın məqamında min il və min il ibadət edərsə, ancaq Əli və
onun ailəsi ilə düşmənçilik edərək İlahi rəhmətə qovuşarsa, Allah onu
Qiyamət günü cəhənnəmə atar”.
Həzrət Peyğəmbər (s) buyurur: "Həqiqətən, Allah qardaşım Əli üçün
fəzilət qərar vermişdir ki, o qədər çoxdur ki, saymaq olmur. Hər kim
onun fəzilətlərindən birini imanla yada salarsa, Allah köhnə və yeni
günahlarını bağışlayar. Hər kim fəzilətlərindən birini yazarsa, o zamana
qədər ki, həmin yazı qalmış olar, mələklər davamlı olaraq, onun üçün
bağışlanma istəyərlər. Hər kim fəzilətlərindən birinə qulaq asarsa,
Allah eşitmə vasitəsilə düçar olduğu günahlarını bağışlayar. Hər kim
yazılmış fəzilətinə nəzər salarsa, Allah görmə vasitəsilə düçar olduğu
günahlarını bağışlayar. Qardaşım Əliyə (ə) baxmaq ibadətdir. Zikr etmək
və yada salmaq ibadətdir. Allah heç bir bəndənin imanını onun vilayəti
olmadan qəbul etməz”.
Bu qədər fəzilətə malik olan və Allahın canişin qərar verdiyi bir insan
cahilliyyətin qurbanı olmuş və cahilliyə görə məzlum edilmişdir. Onun
səbrinin həddi-hüdudu yox idi. Hətta düşmənləri belə fəzilətlərini
etiraf edir və onun haqqında yaxşı sözlər danışırdılar.
Ancaq onun elmindən, qüdrətindən, bacarıq və qabiliyyətindən, imanından,
şücaətindən bərk qorxurdular. Nə qədər bacarırdılarsa, onu insanlardan
uzaqlaşdırmağa çalışır və insanların gözündən salmaq istəyirdilər. Bütün
bunlara baxmayaraq, İmam Əli (ə) həqiqi bir mömin və Allahın ən sevimli
bəndəsi idi və olacaqdır da...
Hazırladı: Məşhədi Xanım /deyerler