.

"Lə İləhə illəllah” - yəni havayi-nəfsin hökumətinə son qoymaq, yəni nəfs səhnəsindən bütün əxlaqi rəzillikləri pak etmək deməkdir. Yəni hüsnü-əxlaqa bürünməkdir. Yəni, bəsirət və ixlasdır.

"Lə İləhə illəllah” - yəni, peyğəmbərlər (ə) kimi şeytanın kökünü kəsənə qədər mübarizə aparmaqdır.

"Lə İləhə illəllah” - yəni, bütün günahların kökünü varlığının diyarından söküb atmaqdır.
Yerinə isə saleh əməl əkməkdir.

"Lə İləhə İlləllah” - yəni gündüzləri pak yaşamaq və gecələri isə paklıq və ibadət ilə səhəri açmaq deməkdir. Yəni, müsəlmanların başına gələn hadislərə laqeyd qalmamaq deməkdir.

"Lə İləhə illəllah” - yəni, Allah bəndəsinin çətinliklərini Allaha xatir həll etmək deməkdir.

Bütün bu savablar ancaq dildə bu zikri deməyimizə görə deyildir.  Bəlkə bu "Lə İləhə illəllah” zikrinin varlıq aləmində təcəllisində, insanın əxlaq və əməlində gizlənmişdir. Bizim "Lə İləhə illəllah” həqiqəti ilə rabitəmiz qüdrət və imkanımız daxilində Peyğəmbərlər (ə), İmamlar (ə) və aşiqləri ilə rabitəmiz kimi olmalıdır.

Həzrət Peyğəmbər (s) buyurur: "İki şey iki şeyə səbəb olar. Biri "Lə İləhə illəllah” şəhadəti olan ölümdür ki, behiştə daxil olmağa səbəb olar. Biri isə şirkdir ki, onunla ölmək cəhənnəmə daxil olmağa səbəb olar”.

Şirkin bariz nümunəsi həva-həvəs, meyllə dolu hökuməti qəbul etməkdir. Şeytanın həyatımıza daxil olması deməkdir. Bəni-Üməyyə və Bəni-Abbasın davamçıları, Firon və Nemrudun davamçıları kimi. Quranın buyurduğu kimi onlar müşrikdirlər və cəhənnəmə daxil olacaqlar.

Şirk - Allahla və həqiqətlə mübarizə deməkdir. Şirk - Peyğəmbərlər (ə) və İmamlarla (ə) mübarizə deməkdir. Şirk yaxşılıqlarla mübarizə və pisliklərlə dost olmaq deməkdir. Şirkdən daha çirkin bir günah yoxdur.

Şirk - nifaqın, küfrün köküdür. İnsanın bütün günahlara bulaşmasının səbəbidir. İmam Sadiq (ə) buyurur: "Bu qədər göz yaşlarının, rükuların, uzun səcdələrin, oruc, həcc, zəkatın dərdini çəkirsiniz, bunlar müşrik Bəni-Üməyyə və Bəni-Abbas hökumətinin qəbulu üçündür. Onların Qiyamət günü əməlləri qəbul olmayacaqdır!”.

İmam Baqir (ə) Peyğəmbərdən (s) belə nəql edir: "Ölülərinizə "Lə İləhə illəllah” kəlməsini təlqin edin. Çünki günahlarının bağışlanmasına səbəb olar”. Soruşdular: "Onu sağ olan zaman demək necə?”. Üç dəfə buyurdu: "Günahların bir çoxunu məhv edər”.

Həzrət Peyğəmbər (s) buyurur: "Cəbrayıl (ə) demişdir: "Kaş məhşər günü iki qrup olan insanları görəydin. Bir qrup "Lə İləhə illəllah” deyib və ona inam bəsləyənlərdir ki, nurlu sima ilə məhşur olarlar. Zikrləri "Allahu Əkbər”dir. Və o birisi qara sima ilə məşhərə gələrlər və nalə çəkərlər: "Mənə vay olsun. Həlak olduq”.

Peyğəmbərimiz (s) başqa yerdə buyurur: "Behiştin qiyməti "Lə İləhə illəllah”dır”.

Beləliklə ayə və hədislərə əsasən behişt təqva və əməl qarşılığında bəndələrə inayət edilər. O kəsin ki, bütün varlığı tövhid nuru ilə əhatə edilmişdir, həyatın çirkinliklərinə bulaşa bilməz. O, İlahi vacibatları və insanlara yaxşılıq etməyi tərk edə bilməz. İnsan o zamana qədər ki, yəqin məqamında deyildir, qəlbi İlahi ayələr səmasında seyr etmirsə, bütün günahlardan kamil iradə ilə boyun qaçırda bilməz. O zamana qədər ki, İlahi vacibatı yerinə yetirmir və
salih əməl görmür, "Lə İləhə illəllah” deməklə behiştə girməz.

"Lə İləhə illəllah” zikrinin savabı.

Həzrət Peyğəmbər (s) buyurur: "Allah Təala Musa ibni Umrana buyurdu: "Ey Musa! Əgər səmalar və və bütün sakinlərini, bütün yeddi qatlı yer üzünü Mənim dərgahımda tərəzinin bir tərəfinə və "Lə İləhə illəllah” kəlməsini o biri tərəfinə qoysalar, həqiqətən, "Lə İləhə illəllah” kəlməsi olan gözü o biri gözündən ağır olar”.

Bəli, bütün yer və göyün və orada olanların tövhidin qarşısında nə dəyəri vardır ki? Məgər bütün aləmi tövhidlə müqayisə etmək olarmı?

Bütün aləmdə tövhid əhlindən daha dəyərlisi, daha əzizi və daha alisi yoxdur. Bu, elə bir insandır ki, var gücü ilə bütün daxili və xarici məbudlarını varlıq məmləkətindən qovmuşdur.

Onun tək məbudu - Allahdır.

Həyatda hər nə istəyirsə, ancaq Ona görə istəyir. Həzrət Peyğəmbər (s) buyurur: "Əgər Əlinin (ə) imanını tərəzinin bir tərəfinə və səqəleyni o biri tərəfinə qoysalar, Əlinin (ə) imanı səqəleyndən ağır olar”. Niyə? Ona görə ki, İmam Əlinin (ə) imanı xalis və mərifəti kamil idi. O Həzrətin (ə) bütün əməlləri, rəftarları, əxlaqı həmin iman və mərifətin təcəllisi idi. Ona görə Peyğəmbər (s) buyurardı: "Əlinin (ə) Xəndək döyüşündəki bir zərbəsi səqəleyn ibadətindən üstün idi”. Çünki bu əməlin əsl mənbəyini tövhid və ixlas təşkil edirdi.

Hazırladı: Məşhədi Xanım