Namaz
haqqında danışmağa bəlkə də ən az layiqli olan bəndə olmağıma
baxmayaraq, ilk növbədə özümü, sonra da sizləri təzkiyə etmək məqsədilə
bu hədisləri yığııb paylaşıram. Çünki namazı əldən verəndən sonra nə
qədər istəyirsən islama xidmət et, nə qədər istəyirsən cəmiyyət üçün
nəsə et, nəsə yarat. Nə fayda?! Məgər öz halımız pərişan olan halda,
kiməsə səadət bəxş edə bilərikmi?! Bu halımız - əlində çıraq tutmuş kor
adama bənzəyir. Biz özümüzü islah etmədən heç kimə bir faydamız
toxunmaz. Özümüzü islahın ən əsas yolu isə namazımızdan keçir.
Namazımızın qəbul olub-olmadığını isə elə özümüz də müəyyənləşdirə
bilərik. Bunun üçün bir sıra hədis və ayələrə nəzər salmalıyıq.
Namazın qəbul olunmasının şərtləri və maneələri
Allahın Peyğəmbəri (s) buyurub: «Əgər kamantək əyilənədək namaz qılsanız
və kamana bənzəyənədək oruc tutsanız, pəhrizkar olub günahlardan
çəkinməyincə Allah Təala (bu əməlləri) sizdən qəbul etməz».
Allahın Peyğəmbəri (s) buyurub: «Allah Təala mənə vəhy etdi: «Ey
Rəsullar nəslindən olan! Ey qorxudanlar nəslindən olan! Öz xalqına bəyan
et ki, onlardan hər birinin boynunda Mənim bəndələrimin birinin bir
məzləmə və haqqı olanadək Evlərimin heç birinə daxil olmayacaqlar. Çünki
o haqqı qaytarmayınca, Mənim qarşımda namaza durduğu müddətdə ona lənət
edərəm».
Allahın Peyğəmbəri (s) buyurub: «Kim müsəlman kişi və ya qadının
qeybətini edərsə, qeybət olunan onu bağışlamayınca, Allah qırx
gecə-gündüz onun namaz və orucunu qəbul etməz».
Allahın Peyğəmbəri (s) buyurub: «Əgər bir şəxs şərab içsə, qırx gün namazı hesaba alınmaz».
İmam Əli (ə) buyurub: «Bax gör, hansı paltar və libasla namaz qılırsan.
Əgər onu düzgün və halal yolla qazanmamısansa, namazın qəbul deyil».
İmam Səccad (ə) namazın qəbul olunmasına səbəb olan şey barədə sualın
cavabında buyurub: «Bizim məhəbbətimiz və vilayətimiz, eləcə də,
düşmənlərimizə nifrət etmək».
İmam Sadiq (ə) buyurub: «Allah Təala kimin bir namazını qəbul edərsə,
ona əzab verməz, kimin bir xeyir əməlini qəbul edərsə, ona əzab verməz».
İmam Cəfər Sadiq (ə) buyurub: «Kim öz ata-anasına ona zülm etmiş olsalar
belə, düşmən baxışı ilə baxsa, Allah Taala onun namazını qəbul etməz».
Namazları qəbul olunmayanlar
Allahın Peyğəmbəri (s) buyurub: «Səkkiz nəfərin namazı qəbul deyil:
fərari qul öz sahibinin yanına qayıdanadək, əri ondan narazı olan dikbaş
qadın, zəkat verməyən şəxs, dəstəmazı olmayan şəxs, namazını baş örtüyü
olmadan qılan həddi-büluğa çatmış qız, xalq ondan narazı olduğu halda
onlarla birgə namaz qılan rəhbər, məst və zəbin adamın, yəni öz sidiyini
və nəcisini güclə saxlayan şəxsin».
Namazın qəbul olunmasında ürəklə qılınmağın rolu
Allahın Peyğəmbəri (s) buyurub: «Allah Taala ürəyi bədəni ilə birgə olmayan şəxsin namazını qəbul etməz».
Allahın Peyğəmbəri (s) buyurub: «Bəzən bəndə namaz qılar, ancaq o
namazın altıda biri, hətta onda biri belə onunçün yazılmaz. Bəndənin
namazından yalnız Allahı tanımaqla və diqqətini Ona yönəltməklə qıldığı
qədəri hesaba alınar».
Allahın Peyğəmbəri (s): «Təfəkkürlə müşayiət olunan iki rükət namaz, gecəni sübhədək namaz qılmaqla keçirməkdən daha yaxşıdır».
İmam Baqir (ə) və İmam Sadiq (ə): «Namazından yalnız ürəkdən qıldığın
qədəri qəbul olunur. Beləliklə, əgər bir şəxs bütün namazı boyu səhv
edərsə (fikri tamamilə dağınıq olarsa), ya onu qılmaqdan qafil olarsa
(vaxtında qılmasa) həmin namazı əski parçası kimi büzüşdürüb onun üzünə
çırparlar».
İmam Sadiq (ə) buyurub: «Kim iki rükət namaz qılsa və onun əsnasında nə
dediklərini bilsə, namazı qurtaran kimi, Allahla onun arasında heç bir
günah qalmaz».
Pərvin Nəsirova/deyerler