Zəmanəsini tanıyan şəxs gözlənilməz
hücumlara məruz qalmaz.
Hər işdən qabaq zəmanənin tələblərini dəqiqliklə araşdırmalı, sonra
isə şəraitə uyğun plan cızmalıyıq. Çünki şəraiti nəzərə almadan
hərəkət etsək, bir çox əziyyətlərimiz gözlədiyimiz bəhrəni
verməyəcək.
İmam Cəfər Sadiq (ə) bu haqda
buyurur: "Zəmanəsi ilə tanış olan şəxs heç vaxt gözlənilməz hücumlara məruz qalmaz”.
Bu sözün bir dünya dəyəri var. Əgər müsəlmanlar və ya inkişaf etməmiş
dövlətlər siyasətlərində bu həyati prinsipə diqqət etsəydilər, heç
vaxt başqa millətlərə məğlub olmazdılar. Problemlərin çoxu inkişaf
etməmiş zəif dövlətlərin böyük dövlətlərdə baş verən köklü
dəyişikliklərdən xəbərsizliyindən doğur.
İslam mədəniyyəti və müsəlmanların elm, sənaye və hərbi sahədəki
inkişafı Qərbi Romada heç bir dəyişiklik yaratmadı. Onlar dünyanın
dəyişikliyindən o qədər xəbərsiz idilər ki, İslam ordusu
Konistantinopolu alanda Roma alimləri qondarma məsələ üzərində
mübahisə edirdilər. Həmin məsələ bu idi ki, görəsən, bir iynənin
ucuna neçə mələk yerləşər?
Tarix təkrarlanır. Həmin tənəzzül müsəlmanlar tərəqqinin ən uca
qülləsinə çatandan sonra onların başına gəldi. Şərq ölkələrinin
rəhbərləri, xüsusi ilə müsəlman ölkələri bütün dünyada baş verən köklü
dəyişikliklərdən tamamilə xəbərsiz idilər. Onlar artıq Avropa elm və
sənayeni zəbt etdikdən sonra ayıldılar.
Osmanlı dövlətinin Avropa millətlərindən aldığı ardıcıl zərbələr
bir an da olsun bu dövləti ayıltmadı. Hakimlər qəflətdə idilər.
Düşmənin fəzanı yaran təyyarələrini görəndə bir qrup heyrətlə səmaya
baxırdı. Onlar güman etmirdilər ki, bu bəşər işi ola bilər. Təsəvvür
edirdilər ki, bütün bunlar mələk və pərilərin işidir.
Miladın on doqquzuncu əsri sənaye və inkişaf əsri idi. Amma İran
dövləti bu vaxt daxili çəkişmələr, qəbilə və xanlıq davasında idi.
Hakimlər o qədər dovşan yuxusuna getmişdilər ki, okeanın o tayından
tamamilə xəbərsiz idilər. Misal üçün, bu xəbəri eşitməyiniz pis
olmazdı:
Fətəli şahın dövründə, Napaleon Hindistanı ələ keçirmək və bu
dövləti İngiltərədən almaq istəyir. O, bu məqsədlə İranın diqqətini
cəlb etmək üçün Qacar şaha məktub yazır. Şahın sarayında Napaleonun
məktubunu tərcümə etmək üçün bir nəfər tapılmır. Məktubu konsulluğa
və yad əllərə verməkdən də bəzi məsləhətlərə görə çəkinirlər. Həmin
məktubu İranın Bağdaddakı konsulluğuna göndərirlər. Oranın bəzi
üzvləri fransız dilini bilirdilər.
Belə yuxulu millət heç vaxt öz siyasi, iqtisadi və mədəni
müstəqilliyini qoruya bilməz. O, həmişə başqa millətlərə möhtac
olmalıdır.
Böyük Papa dövlətinin uzunmüddətli hakimiyyəti, nəhayət, sona
çatır. Papa dövləti özünün dünyəvi qüdrətini qorumaq üçün
"inkivizisya” təşkilatını yaradır. Amma böyük səhvə yol verir. Onlar
camaatın arasında papaların puç fikirlərini məhv etmək istəyən köklü
dəyişikliklərdən xəbərsiz idilər. Təsəvvür edirdilər ki, əziyyət,
öldürmək və zülm etmək bu selin qarşısını ala bilər. Amma bu fikir
onun zəmanənin dəyişikliyindən xəbərsiz olmasını göstərirdi. Əgər
ömrünün axırlarında yeni plan cızmasaydı və özünü zəmanə ilə
uyğunlaşdırmasaydı, hazırda məsihi dinindən dünyada əsər - əlamət
qalmazdı.
O, yuxulu gözlərini ovuşdurub, yolunu dəyişərək orta məktəb,
institut təsis etməklə, ictimai və elmi xidmətləri ilə mövqeyini bir
daha bərpa edir.
On doqquzuncu əsrdə Əmir Kəbir Avropadakı dəyişikliklərdən
xəbərdar olur. Dövrünün şərtlərini anlayır. Dərk edir ki, artıq qılınc,
ox və kamanla müharibə dövrü başa çatıb və sənaye istehsal üslubunu
dəyişib.
O, dəqiq araşdırmalar və dünyagörüşü ilə dərk edir ki, geridə qalmış
dövlətlərin bədbəxtçilik səbəblərindən biri onları Avropanın bazarına
çevirən Avropa iqtisadiyyatına bağlılıq olmuşdur. Avropa
istehsalçı, bunlar isə istehlakçıdırlar. O, həm də dərk edir ki, bu
bağlılıq və ya daha gözəl desək, bu biçarəlik İran sənayesinin və
potensialının tamamilə məhvinə səbəb olmuşdur. Ona görə də 1849-cu
ildə "Darülfünun” (Universitet) tikdirməyə başlayır. 1850-ci ildə
onun şərq binasının tikintisini başa çatdırır.
O, özünün etibarlı adamlarını Vyenə göndərdi ki, bir nəfər quru
qoşunlar müəllimi, bir nəfər topçu, bir həndəsə müəllimi, bir
mədənşünas, iki mədənçi, bir həkim və cərrah, bir dərman mütəxəssisi
illik dörd min tümən əməkhaqqı ilə beş, ya altı il müddətinə işləmək
üçün İrana dəvət etsinlər.
Əmir sənayenin inkişafı məqsədi ilə sərmayəçilərə kifayət qədər
vəsait verir. O, Sari şəhərində şəkər fabriki, Tehranda toxuculuq və
bez istehsalı fabriki, Kaşanda ipək fabriki, İsfahan və Tehranda samavar
və faytondüzəltmə zavodları təsis edir. İsfahan və Kaşan
toxucularına çoxlu yardımlar edir. Alimləri müxtəlif sahələrdə
yeni kəşflər və ixtiralar etməyə təşviq edir. İranın milli
məhsullarından Tehranın Ərk qəsəbəsində sərgilər təşkil edir.
Təəssüflər olsun ki, millətin bu yanar məşəlini söndürmək üçün xain
dəstələr fəaliyyətə başlayırlar. 1851-ci ildə Qacarın cəlladları
"Darülfünun”un ilk açılışında Əmir Kəbiri öldürürlər.
İranda şose yolları salınanda at, ulaq və kəcavə öz fəaliyyətini
itirdi. Bu vaxt kəcavə sürənlər nalə edərək, hakimiyyətdən istəyirlər
ki, maşın sürücülərinə sürücülük icazəsi verməsin. Bu fikirlər
dünyadakı dəyişikliklərdən xəbərsizliyin məhsulu idi.
Çox vaxt bizim tacirlərimizin işlərini bugünkü dünya bəyənmir.
Həqiqətdə onlar dəyişiklik və təkamüllə mübarizə aparırlar. Nəticədə
isə qəti məğlubiyyətlə üzləşirlər.
Burada biz böyüklərimizin qiymətli sözlərindən birini başa düşürük: "Zəmanə ilə döyüşməyin, yoxsa sizinlə döyüşərlər”.
Müvəffəq insan zamanın nəbzini tutan və düşməni tərəqqi vasitəsi
bilən şəxsdir. Alimlər düşməni insanın müvəffəqiyyət vasitəsi
bilirlər. Çünki düşmən bizim eyblərimizi qələm və dillə əks etdirən ən
gözəl güzgüdür. Düşmən qürurumuzu azaldır. Bəzən də gizli
istedadlarımızın üzə çıxmasına kömək edir.
Şərq və qərbin inkişafları rəqabətlərin məhsuludur. Rəqabət olmasa, istedadlar çiçəklənməz.
"Necə Uğur Qazanmalı" kitabından
Materialdan istifadə zamanı istinad (www.parlayangunesh.az) zəruridir.
|