Deyerler.org: 23
dekabr 2011-ci il tarixində İçərişəhər "Cümə” məscidinin imam-camaatı
Hacı İlqar İbrahimoğlunun imamlığı ilə möminlər və möminələr növbəti
cümə namazını qıldılar. Cümə namazının azanı səsləndikdən dərhal sonra
mömin və möminələr cümə xütbələrini dinlədilər.
Cümə xütbələrinin ilkində cümə xətibi, ilk olaraq özünə və sonra cümə
namazı iştirakçılarına İlahi təqvaya riayət etməyi tövsiyə etdi. Xətib
bu işdə Uca Allahdan xüsusi tofiqat dilədi.
Sonra Hacı İlqar əziz İslam Peyğəmbərindən (s) bir hədisi nəql etdi. "Hər
kimdə bu üç şey olmasa, heç bir əməli kamilləşməz: onu Allaha
itaətsizlikdən saxlayan pəhrizkarlıq, insanlarla yola getməsinə səbəb
olan xasiyyət və nadanın cahilanə rəftarını dəf edən səbirlilik”.
Hədisin şərhində Hacı İlqar mübarək kəlamda deyilən nöqtələri izah
etdi: "Bəzən insanlar əməl edərlər, amma bu əməlin kamilləşməsi olmur.
Bəzən 10-20 il ibadət əhli olanların hallarında, durumlarında dəyişiklik
müşahidə edilmir.Namazları, orucları ritual xarakterli ola bilir. Mübarək dinimiz əməllərin çoxluğuna önəm vermir, onun keyfiyyətinə önəm verir.
İbadətinin sayı yox, onların səni hara aparması daha önəmlidir. Bu
səbəbdən mübarək Peyğəmbərimiz (ə) bu mübarək hədisdə çox önəmli 3
nöqtəyə toxunur. "Niyə biz bəzən iyirmi il namaz qılırıq, amma
düzəlmirik?” sualının cavabı burada verilir.
- Allaha itaətsizlikdən saxlayan pəhrizkarlıq. Bu, çox önəmli
məqamdır. Təqvanın ən mühüm hissəsi - Allaha itaət və təqvasızlığın ən
mühüm hissəsi - Allaha itaətsizlikdir. Əgər sən işlərini Allaha görə
edirsənsə, itaətkarsan. Öz günümüzün hesab-kitabını etsək, bir
gün ərzində etdiyimiz əməllərin siyahısını hazırlasaq və onların içində
hansının Allaha görə, hansını isə nəfsə, qonşuya, dosta görə edildiyini
ayırsaq - nə qədər itaətkar və nə qədər itaətkarsız olduğumuzu görərik.
Allaha itaət və ibadət dedikdə, təkcə namaz və oruc nəzərdə tutulmur.
Bəzən ixlasla dediyin xoş sözün özü də bir ibadətdir və Allaha
itaətkarlığın göstəricisidir. Əgər bizi belə işlərdən saxlayan nə isə
varsa, onu düzəltməli və ya tərk etməliyik. Çünki o, bizim Allaha xatir etdiyimiz digər əməllərin kamilləşməsinin qarşısını alır.
- İnsanlarla yola getməsinə səbəb olan xasiyyət. Dinimizin ən çox
vurğuladığı məsələ - insanlararası münasibətdir. Bunun özü də bir
ibadətdir. İnsanlarla neçə rəftarın, sənin insani keyfiyyət
göstəricindir. Bunun üzərində ciddi işləmək, vaxt ayırmaq lazımdır. İbadi
məsələlərimizə vaxt ayıtdığımız kimi, insani münasibətlərin inkişaf
etdirməsinə də vaxt ayırmalıyıq. Əgər insanlar "bu əsəbidir”, "bu
hisrlidir” deyib, bizə yaxınlaşmağa, bizə söz deməyə qorxursa, deməli
xasiyyətlərimiz insanlarla yola getmə indeksini ödəmir. Əgər insanlarla yola getməsinə səbəb olan xasiyyət yoxdursa, onda heç bir əməli kamilləşməz.
- Nadanın cahilanə rəftarını dəf edən səbirlilik. Əməllərimizin kamilləşməsinə mane olan üçüncü amil isə səbirsizlikdir. Səbir
o anlama gəlmir ki, insan hər vəziyyətdə sükut etsin, səssiz qalsın.
Səbir səndən olan mümkünləri etdikdən sonra başına gələcəkləri həzm
etməkdir. Səbrsizlik insanı cahilanə hərəkətlərə sövq edir. Həm
özünü, həm də ətarını. Ona görə də səbir göstərsən, həm özünü cahilanə
rəftardan saxlayarsan, həm də ətrafındakıların cahilanə hərəkətlərini
düzəldərsən.
Allahdan istəyirik ki, Əziz Peyğəmbərimiznin (s) buyurduğu bu üç
xüsusiyyətin bizdə formalaşmasını nəsib etsin ki, əməllərimiz
kamilləşsin”.
İkinci xütbədə ilk öncə müsəlmanlar üçün Uca Rəbdən bağışlanma və əfv
diləyən xətib, özünə və hər kəsə İlahi təqvaya riayət etməyi tövsiyə
etdi. Xətib israrla vurğuladı ki, əgər İlahi təqva olmasa, insanın
həyatı tamamən mənadan məhrum olan bir nəsnəyə çevrilər.
Xütbənin davamında dünyada və ölkədə baş verən hadisələrə toxunan Hacı İlqar, Allah dərgahında olmağımızı xatırlatdı: "Başımıza
gələnlərin bəd hadisələrin çoxu məhz Allah dərgahında olduğumuzu
unutduğumuza görədir. Əgər fərqində olsaq ki, Allah bizi görür və biz
onun hüzurundayıq, heç bir xətaya yol vermərik. Əgər bir şey
Allaha dərgahında edilirsə, heç vaxt aradan gedə bilməz. Çünki Allah
dərgahı əbədidir. Allahdan qeyriləri isə bir gün məhvə məhkumdur. İşləri
Allah deyən kimi etsək, Allahdan yapışsaq, Ondan istəsək qalan
problemlər gözümüzdə yox olmaq dərəcəsinə qədər kiçilər. Bəzən insan
Allah dərgahında olmağını xatırlamadan qılar namazını, bir gün oruc
niyyəti ilə aç qalar, amma Allah dərgahında olduğunu xatırlamaz.
Halbuki, ibadətlər bizə Allah dərgahında olmağımızı xatırlatmaq üçündür.
O cümlədən, namaz - Allah dərgahında olmağımızı xatırlatmaq üçündür”.
Daha sonra xətib cavanlara səsləndi və onlara dəyərlərinə sahib çıxmağa çağırdı:
"Çox diqqət edilməli bir tarix yaşayırıq. Xüsusən gənclər üçün çox
önəmli bir dövrdür.. Bəzən 1 ayda 10-20 ilin sürəci baş tutur.
Əlhəmdulillah”.
Xətib Aşuranın qeyri-iş günü olması təşəbbüsünə toxundu. Sonra isə
Peyğəmbərimizi (s) təhqir edənlərə sayğı duruşu etməmənin böyük səs-küyə
səbəb olmasını dedi və qırmızı xətlərin keçilməz olmasına diqqət çəkdi.
Daha sonra xətib xütbəsinə Fransa Parlamentində qəbul olunan qondarma "erməni soyqırımı” məsələsi ilə davam etdi:
"Əslində təəccüblənməli bir hadisə baş verməyib. Fransada maraqlı
təzadlar mövcuddur. Holokostu qəbul etməsən, erməni soyqırımın qəbul
etməsən fikir azadlığı sayılmır və həbs edilirsən. Ancaq əziz Peyğəmbəri
(s) təhqir etsən - fikir azadlığı sayılır. Pis görünüşdə gəzəndə,
özünüifadə sayılır, ancaq niqab geyinsən - cərimələyirlər.
Azərbaycanın bu məsələdə mövqeyi hələ ki, çox zəifdir. Türkiyə ilə paralel addım atmalıyıq”.
Sonda xətib Məhərrəm-Səfər əyyamının günümüzdə yaşamağına xüsusi
diqqət ayırmağın vacibliyindən danışdı. Zindanda olanlar üçün, xəstələr
və ehtiyacı olanlar üçün dua etdi.
Xütbələr yekunlaşdıqdan sonra Hacı İlqar İbrahimoğlunun imamlığı ilə
mömin və möminələr cümə namazını qılmış, zikrlər, dualar etmiş,
salavatlar zikr etmiş, sonda "Fərəc” duasını oxumuşlar.
/Deyerler.org/
|