.

Bu il isə ilk dəfə olaraq balacalar arasında olimpiada təşkil olunub. Olimpiadada iştirak edənlərin azyaşlılar olduğunu nəzərə alaraq, yarış qabağı uşaqlarla əyləncəli proqram təşkil olunmuşdu. Uşaqlar biri-birindən maraqlı şeİrlər söylədilər, bir-birlərinə tapmacalar deyib tapdılar, hədislər söylədilər və s.

Daha sonra isə gərgin bilik yarışı başladı. Yarışda ibtidai sinif şagirdləri yarışırdılar. Olimpiadanın təşkilatçıları "Deyerler.org”a açıqlamalarında bildirdilər ki, uşaqların yarışması böyüklər arasında keçirilən yarışmadan daha çox emosionaldır. Təşkilatçılar uşaq olimpiadasının keçirilməsi ideyasının necə ortaya çıxması barədə deyirlər ki, hər il böyüklər arasında olimpiada keçirilərkən azyaşlılar da qatılmaq istəyirdilər. Bunu nəzərə alaraq, bu il uşaqlar arasında Mövlud Olimpiadasının keçirilməsinə qərar verdik.

Olimpiadada 6-9 yaşlı uşaqların iştirak etdiyini nəzərə alaraq, təşkilatçılar qiymətləndirməni xüsusi üsulla həyata keçiriblər. Belə ki, 6 yaşlı uşaqlara 3-cü dərəcəli, 7 yaşlı uşaqlara 2-ci dərəcəli, 8 yaşlı uşaqlara 1-ci dərəcəli əmsallar üzrə xüsusi artırmalar tətbiq edildi, 9 yaşlı uşaqlara isə bu əmsal "0” səviyyəli oldu, yəni baza qiymətləndirmə saxlanıldı.

Yarışda iştirak edən bütün uşaqlar olimpiadadan sonra keçirilən bayram konserti zamanı diplomlarla təltif edildilər. Bu uşaqların əksəriyyəti ömürlərində ilk dəfə idi ki, diplom alırdılar.

Mükafatlandırma mərasimi zamanı çıxış edən Hacı İlqar İbrahimoğlu keçirilən olimpiada ilə bağlı fikir söyləyərkən maraqlı bir nöqtəyə toxundu: "Bu uşaqların hər biri əgər bu olimpiadalarda iştirak edib bir gün dünyada elmdə söz desələr - bu, ümmətin inkişafı deməkdir”.

I Uşaq Mövlud Olimpiadası çox təntənəli şəraitdə yekunlaşdı.   


/Deyerler.Org/