Ayətullah Xamenei Qərbin hicaba baxışını pislədi
İran
İslam İnqilabının Rəhbəri Ayətullah Xamenei ölkənin teoloji mərkəz və
universitetlərində dərs deyən ziyalı xanımlarla, habelə zərif cinsin
müxtəlif sahələrdə çalışan yüzlərlə görkəmli nümayəndəsi ilə görüşüb.
İslam-Azeri.az İnternet qəzetinin Leader.ir-ə istinadən verdiyi xəbərə
görə, Ayətullah Xamenei İslamda qadının mövqeyi haqda danışıb. O Qərbdə
qadına münasibətin çox pis halda olduğunu bildirərək deyib: "İslam
dövlətində qadının həqiqi statusunun bərpası üçün bir sıra işlər
görülüb, lakin hələ də bir çox problemlər var. Xüsusilə də ailədə qadına
qarşı münasibətlə bağlı bəzi xoşagəlməz hallar özünü göstərir ki,
bunlar hüquqi bazanın yaradılması və icrası yolu ilə həll olunmalıdır”.
İki
dünya xanımı Fatimeyi-Zəhranın (s.ə) mövludu və bu münasibətlə ölkədə
qeyd olunan "Qadınlar Günü” ərəfəsində baş tutan görüşdə Ayətullah
Xamenei iştirakçıları bu mübarək təvəllüd münasibətilə təbrik edib.
"İran İslam Respublikası uca bir zirvəyə yol tapmağı bacarıb. Bu zirvə
intellektual, ziyalı, cəmiyyətin ən incə və həssas problemləri ilə bağlı
özünəməxsus rəy və görüşləri olan xanımların tərbiyə olunmasından
ibarətdir”deyən İran İslam İnqilabının rəhbəri müasir dünyanın qadın
məsələsi ilə bağlı üzləşdiyi problemlərin kökündə Qərb sivilizasiyasının
qadının cəmiyyətdəki statusuna yanlış baxışı, ailə münasibətlərinə
qeyri-düzgün yanaşma tərzi durduğunu bildirib.
Sözlərinin davamında Ayətullah Xamenei deyib: "Bu iki amil qadın
mövzusunun dünyada özünəməxsus böhrana çevrilməsinə səbəb olub. Qərbin
müxtəlif toplumlara tədricən təbliğ edib aşıladığı qeyri-bərabər
münasibətlər sistemində bəşəriyyət iki qrupa bölünür: mənafeyi daim ön
planda duran tərəf hesab olunan "kişilər” və daim mənafeyi qurban
verilən, istifadəyə məruz qalan tərəf olan "qadınlar”. Bu yanlış
prinsip və yanaşmaya əsasən, Qərb sivilizasiyasında özünü və
şəxsiyyətini təsdiq etmək istəyən qadın, hökmən,kişinin – yəni mənafeyi
daim ön planda duran tərəfin istədiyi və bəyəndiyi kimi davranmalıdır.
Bu formada təhqirə məruz qalması isə qadına qarşı ən böyük zülm və
haqsızlıqdır. Məhz buna görə də bu gün qadının gözəllik və cazibəsinin
ictimaiyyət içərisində nümayiş olunmasını qınayan hər kəs Qərbin siyasət
və təbliğat mexanizmlərinin hücumlarına məruz qalır, hay-küylü müzakirə
və tənqidlərin obyektinə çevrilir”.
İslam İnqilabının rəhbəri sonda Qərbin hicaba qarşı hücumlarını
pisləyərək deyib: "Qərblilər hicabın dini atribut olduğunu, dünyəvi
cəmiyyətdə açıq-aşkar nümayişinin məqsədəuyğun olmadığını iddia edirlər.
Lakin Qərbin baş örtüsünə qarşı müxalifətinin əsl səbəbi budur ki,
hicab onların qadınla bağlı yürütdüyü prinsipial və strateji siyasətə,
yəni qadının ucuzlaşdırılmasına, asanlıqla əldə olunan bir əşya kimi
təqdim olunmasına qarşı mübarizə aparır, bu siyasətin gerçəkləşməsinə
əngəl törədir”.
Əli
İslam-Azeri.az
| 
