Bakıda qadınlar da "qul bazarı”na yığışır
Onlara
yaxınlaşan kimi tez üstümə qaçdılar. Qolumdan tutub hərəsi bir tərəfə
dartışdırmağa başladılar. Başa saldım ki, mənə işçi lazım deyil:
"Jurnalistəm mən. Sizin haqqınızda yazı yazmaq istəyirəm”.
Qadınların "qul bazarı”
Onlar dayandıqları yeri "fəhlə bazarı” adlandırırlar. Bakıda belə yerlər
az deyil. Camaat buralara "qul bazarı” deyir. Buranın isə böyük bir
fərqi var. Burada kişilər deyil, qadınlar dayanır. Onların yeri Nəsimi
bazarının arxa tərəfidir. Öyrəndik ki, buna oxşar məkanlardan biri də
Bakının Maştağa kəndində var.
"Nəsimi” bazarının arxasındakı bu işçi bazarı yeni deyil. Illərdir ki,
qadınlar bura yığışır. Bəziləri bir neçə aydır bura gəlib-gedir.
Bəziləri isə deyir ki, artıq 10 il olub.
"Şəklimizi çəkmə!”
Yolun kənarında, səkinin üstündə oturublar. Gün təpələrinə döyür. Çox
yorğun görünürlər. Jurnalist olduğumu biləndən sonra da rahatlaşmırlar.
Xahiş edirlər ki, şəkillərini çəkməyim. Onları birtəhər inandırıram ki,
şəkil çəkməyəcəm.
Cibimdən diktafon çıxarmaq istəyirəm ki, yenə hərəsi bir tərəfə qaçır. Səslərini yazmayacağıma da söz verirəm...
"Evdən çıxanda oğlanlarım bilmir hara gedirəm”
40-45 yaşlarında qadınlar hər gün bura pul qazanmaq üçün gəlirlər.
Onları evlərə aparıb işlədirlər. Qadınlar şüşə silirlər, otaqları
təmizləyirlər. Nə iş olsa, görürlər. Təki pul olsun...
Hər gün 15-ə yaxın qadın yığışır bura. Gördükləri işin əvəzində 10-30
manat pul alırlar. Gün yandırmasın deyə, üzlərini bağlayırlar. Bu, həm
də yoldan ötənlərin onları tanımaması üçündür. Baxmayaraq ki, özləri
bunu inkar edir.
"Mən evdən çıxanda oğlanlarım bilmir hara gedirəm. Elə bilirlər ki,
hansısa evdə işləyirəm. Hər gün gəlib burada dayandığımdan xəbərləri
yoxdur. Əgər yaxınlarımdan kimsə bilsə, utandığımdan yerə girərəm.
Kirayə qalırıq. Dolanmaq olmur. Elə olur ki, günlərlə iş tapılmır”, -
deyə söhbətləşdiyimiz qadınlardan biri acınacaqlı durumundan danışır.
"Bəzən elə varlı adamların villalarına gedirik ki...”
"Başqa yerdə iş olsa, əlbəttə ki, gedərik. Biz də anayıq. Kim istəyər
anası gəlsin burada dayansın?! Maşınların qabağına qaçsın... Bəzən elə
varlı adamların villalarına gedirik ki, adam görəndə dəli olur.
Baxırsan, çoxlu maşını, beş-altı yerdə evi var. Nolar ki, bir dəfə biz
kasıblara əl tutsalar?!”, - bunu da başqa bir orta yaşlı xanım deyir.
Qadınlardan biri danışarkən ağlamağa başlayır. Dəfələrlə xahiş edir ki,
onun adını və şəklini qəzetdə verməyim. Niyə ağladığını soruşuram.
Yaşadığı həyatdan bezdiyini deyir: "Ərim yoxdur. Iki yetimimlə qalıram.
Onları mən saxlayıram. Səhər səkkizdən gəlib burada dayanmışam. Indiyə
kimi bir manat da olsun qazanmamışam. Bundan qabaq kafedə qabyuyan,
aşbaz köməkçisi, şirniyyat sexində işləmişəm. Günə 7-8 manat verirdilər.
Bu pulla uşaq saxlamaq olmur axı... Prezident hər gün binalar tikdirir,
yollar çəkdirir. Bahalı-bahalı ağaclar gətirib bulvarda əkirlər.
Bunların əvəzinə yetim-yesirə, kasıb-kusuba kömək eləsələr, nə olar?!”
Gözəllər "bazarı öldürür”
Kişilərin işçi bazarında olduğu kimi, qadınlar da dayanan maşınların
qabağına qaçırlar. Hər kəs çalışır ki, irəli keçsin. Buna görə
aralarında tez-tez dava-dalaş olur. Hamı "iş tutmağa” çalışır.
Ona görə bir-birlərindən şikayətlənirlər: "Burada bəziləri var, daha
gözəldilər, daha cavandılar. Ona görə onları daha çox aparırlar
işləməyə”.
Elmin Həsənli / Azadlıq qəzeti
| 
