Elşən Mustafaoğlu Xanım Zeynəb (ə) barədə
İslam
aləmi bu günlərdə İmam Əli (ə) və Fatimeyi-Zəhranın (s.ə) övladı xanım
Zeynəbin mövludunun fərəhini yaşayır. İlahiyyatçı alim, fəlsəfə doktoru
Elşən Mustafaoğlunun SalamNews-un əməkdaşı ilə söhbəti bu şərəfli insan
barədədir.
- İlk öncə, xanım Zeynəbin şəxsiyyəti və həyatı barədə danışmaq istərdik...
- Əvvəla, bu gözəl gün münasibətilə əziz xalqımızı təbrik edirəm. Həzrət
Zeynəb (ə) İslam tarixinin parlaq şəxsiyyətlərindən biridir və o,
dünyanın haqq və ədalət mübarizəsi tarixində dərin iz qoyub gedib.
Həqiqətən də, Həzrət Zeynəbdən (ə) öyrəniləsi çox məqamlar var. Əvvəla,
o, bir qadındır - siyasi-ictimai həyatda aktiv olan, cəmiyyətin
problemlərinə seyrçi yanaşmayıb, söz sahibi olan bir xanım.
- Amma əsrlərdən bəri müsəlman Şərqində belə təəssürat formalaşdırılıb
ki, guya qadın ictimai proseslərdən kənarda qalmalı, bu mənada passiv
həyat sürməlidir...
- Peyğəmbər ailəsində göz açıb böyümüş, peyğəmbər ailəsinin tərbiyəsini
almış Zeynəb bu mifi yox edir və əsl müsəlman qadınının xüsusiyyətlərini
göstərir – evdə, ailə sədaqətli xanım, övlad tərbiyəsində nümunə,
yüksək iman və təqva sahibi, eyni zamanda lazım gəldikdə, ehtiyac
duyulduqda qardaşıyla çiyin-çiyinə zülmkarlığa qarşı mübarizə aparır –
haqsızlıqları faş edir, ilahi dəyərlərin keşiyində dayanır. Kərbəla
faciəsini dünyaya ilk duyuran, bu hadisəni siyasi-ictimai bir fenomen
olaraq təqdim edən, onu təhlil və şərh edən parlaq bir simadır Xanım
Zeynəb.
- O həm də bir qadın kimi qorxmazlıq, mücadilə, mətanət və cəsarət simvoludur.
- Bir çoxları bu gün süni qəhrəmanlar düzəldib, insanları bu istiqamətdə
tərbiyə etməyə çalışırlar. Bizim buna ehtiyacımız yoxdur, bizim həqiqi,
gerçək qəhramanlarımız var! Sadəcə, bu şəxsiyyətlərin həyatını
öyrənməyə və faydalanmağa ehtiyacımız var. Bu gün cəmiyyətimiz Zeynəbi
tanımırsa, deməli, böyük bir məktəbdən məhrumdur. O və onun kimi parlaq
şəxsiyyətlərimiz Quranı həyatlarıyla yaşayan iman və təqva
nümunələridirlər. Və sevindirici haldır ki, əsrlərdən bəri Azərbaycan
xalqı Peyğəmbər və onun Əhli-Beytinin digər üzvləri kimi, Həzrət
Zeynəbin də mənəvi varlığını yaşada bilib, onun adını uca tutub, dərin
ehtiramla qəlbində yaşadıb. Bu, Zeynəb məktəbinin inkişafı üçün böyük
bir fürsətdir və inanıram ki, xalqımız bu fürsəti qaçırmayacaq.
Günümüzün qızları da bir Zeynəb olacaq qardaşlarına...
| 
