Hacı İlqar və Hacı Elşən beynəlxalq konfransda
İİR-in
paytaxtı Tehran şəhərində mayın 14-dən etibarən öz işinə başlayan
"Ədalətli Sülh Uğrunda Terrorizm Əleyhinə Ümumdünya Alyans”ın Beynəlxalq
Konfransı dünyanın bir çox insanlarını toplamışdır.
İçərişəhər Cümə məscidinin imam-camaatı, DEVAMM sədri Hacı İlqar
İbrahimoğlu sözügedən beynəlxalq Konfransla bağlı Deyerler.org-a
açıqlama vermişdir: "Son zamanlarda dünyada cərayan edən proseslər açıq
şəkildə göstərir ki, ədalətli sülhə ehtiyac var. Buna ən böyük maneə isə
terrordur. Terrordan ən çox əziyyət çəkən isə İslam aləmidir ki, bu da
müsəlman dünyasının hər yerində özünü təzahür etdirir”.
Terrorun ölkəmiz üçün aktuallığını vurğulayaraq, dövlət terroruna məruz
qaldığımızı qeyd edən Hacı İlqar açıqlamalarının davamında demişdir:
"Terror gündəmi bizim vətənimiz üçün də aktuallıq kəsb edir və biz də
Ermənistan tərəfindən dövlət səviyyəsində terrorla qarşılaşmışıq. Hesab
edirik ki, Qarabağda baş verənlər Bəhreyn, Kəşmir, Fələstin və digər
İslam coğrafiyasında baş verənlərlə eynidir. Tehranda keçirilən bu
konfrans özü bir fürsətdir ki, bu məsələyə biz bir daha diqqət çəkək”.
"Mənəvi Saflığa Dəvət” İB-nin rəhbəri Hacı Elşən Mustafaoğlu hazırki
konfransla bağlı fikirlərini bölüşərkən "deyerler.org"-a söyləmişdir:
"Bu gün terrorizm mövzusu bütövlükdə dünya üçün ən aktual problem və
mövzulardan biridir. Lakin ölkəmiz üçün terrorizm mövzusunun xüsusi
əhəmiyyəti var. Belə ki, Azərbaycanımız son iyirmi ildə terror və
vandalizmin ən bariz nümunəsilə, Ermənistan tərəfindən aparılan terrorun
ən təhlükəli forması olan dövlət terroru ilə üz üzə qalıb. Onminlərlə
vətəndaşımız qətlə yetirilib, ərazi bütövlüyümüz pozulub, amma yenə də
erməni terroru dünya miqyasında lazımi qiymətini almayıb. Terrorçu
Ermənistanın cəzasız qalması dünyada terrorçuluq tendensiyasına sanki
rəvac verir. Bu kimi beynəlxalq tədbirlər terrorizmi ifşa etmək və
dünyanın sülhsevər qüvvələrini terrora qarşı səfərbər etmək üçün gözəl
bir fürsət yaradır. Ümid edirik ki, bu konfransda Azərbaycanımızın da
dərdini dünyaya duyurmaq mümkün olacaq".
Qeyd edək ki, sözügedən beynəlxalq konfransda Azərbaycanı Hacı İlqar
İbrahimoğlu və Hacı Elşən Müstafaoğlu təmsil edir. Tədbirin
işıqlandırılması üçün "Deyerler.org" konfransa akkreditasiya olunub.
Deyerler.org
| 
