Deyerler.org:
Bəsirət odur ki, insan şeytanın yaratdığı fitnə mühitində haqla batili
bir-birindən ayıra bilsin və haqq yolunu azmasın. Bəsirət, yəni haqqı
görən göz. Ancaq göz zahiri deyildir, bəlkə batinidir. Zahiri gözün
etdiyi səhvləri də etməz. Hər bir müsəlman arzu edir ki, bəsirətli olsun
və həqiqətləri görə bilsin. Ona görə də bəsirət gözümüzü aça bilən 8
yola işarə edək və onlara əməl etməyə çalışaq. (Tebyan)
1. Zəmanənin vilayətini tanımaq və qəbul etmək.
Zəmanənn vilayətini tanımaq - İslam dinində ən mühüm məsələlərdəndir. Peyğəmbərin (s) buyurduğu kimi: "Əgər insan ölər və İmam Zamanını (ə) tanımazsa, İslamdan əvvəlki cahiliyyət dövründə ölənlər kimi olar”. Ona görə də hər bir müsəlman
öz İmamını (ə) tanımalı və ona itaət etməlidir. Bu əməl bəsirətinin
açılmasına səbəb olar. İmam Əli (ə) iki səhabəsinə xitab edərək buyurur:
"Əhli-beyt (ə) davamçılarından hər kim bəsirətə çatmırsa, məni
tanıyaraq nuraniyyətə çatar. Nə zaman məni bu məqamda tanıdınız, deməli
kamil şəkildə bəsirət əldə etdiniz”.
2. Fikir və düşüncəyə malik olmaq.
İnsanın bəsirətə çatmasına kömək edən yollardan biri də düşünmək və
ictimai, siyasi məsələləri təhlil etməkdir. İmam Əli (ə) buyurur: "O kəsin ki, fikri olmaz, bəsirəti olmaz”.
İnsan bir xəbəri eşidəndə və ya görəndə onu həmin an qəbul etməməlidir.
Bəlkə düzgünlüyünü yoxlayıb, təhlil etməli və ondan sonra onu qəbul
etməlidir.
3. Məsələlər haqqında uzaqgörən olmaq.
İnsanın bəsirətli olmasına kömək edən yollardan biri də insanın uzaqgörən olmasıdır. İmam Əli (ə) buyurur: "Hər kim əvvəlcədən gözüaçıq olar və işləri qarşılamağa gedər (məsələlərə qarşı uzaqgörən olar), görən olar”. (bəsirətli).
4. Dindar alimlərin ardınca getmək.
İmam Baqir (ə) belə alimləri təsvir edən zaman buyurur: "Alim
o kəs kimidir ki, yanında şamı vardır, onun vasitəsilə cəhalət zülməti
aradan gedər. Hər kim bu nur ilə aydınlanarsa, heyrətdən xaric olar və
cəhalətdən nicat tapar”.
5. İlahi təqvaya və imana riayət etmək.
Bəsirət əldə etməyin başqa yollarından biri də İlahi təqvaya riayət etməkdir. "Ey
iman gətirənlər, əgər Allahdan qorxsanız, (İlahi təqvaya riayət
etsəniz) O, sizə (haqla batili bir-birindən) ayırd edən bir qüvvə verər,
sizin (kiçik) günahlarınızı təmizləyər, və sizi(n böyük günahlarınızı)
bağışlayar”. ("Ənfal” 29). Saleh əməl görmək, vacibatları
yerinə yetirmək, haramdan uzaq olmaq, insan daxilinə nuraniyyət bəxş
edər. İnsan onun yardımı ilə haqla batili bir-birindən ayıra bilir.
Şeytanı vəsvəsələri rahatla tanıyır və özünü onun tələsindən xilas edir.
6. Müxtəlif məsələlərdən ibrət almaq.
Əgər insan ətrafında baş verənlərə və eyni zamanda keçmişdə baş
vermiş hadisələrə ibrət gözü ilə baxarsa, bəsirət əldə edər və həlak
olmaqdan nicat tapar. İmam Əli (ə) buyurur: "Hər bir ibrət götürülən şeydə bəsirət vardır”. Başqa yerdə buyurur: "İbrət götürmək davamlı olarsa, bəsirətə tərəf çəkər”.
7. Zikr və Allahı yada salmaq.
Bəsirətə çatmağın yollarından biri də zikrdir. İmam Əli (ə) buyurur: "Hər kim Allahı yada salar - bəsirət əldə edər”.
8. Bəsirət əhlinin yolunu getmək.
İmam Hüseynin (ə) Aşura səhnəsindəki ən üstün xüsusiyyətlərindən biri
bəsirət idi. Həzrət Abbas (ə) haqqında da oxuyuruq ki, onun şəhadəti də
bəsirətli bir şəhadət idi. Müslim ibni Əqilin də şəhadəti bəsirətli bir
şəhadət idi. Çünki onlar bu şəhadət yolunda Bədr şəhidlərinin və başqa
mücahidlərin yolunu getmişdilər. Əgər biz də bu bəsirət əhlinin getdiyi
yolun yolçusu olsaq, bəsirətə çatarıq.
/Deyerler.org/