Cümə namazından reportaj – 15.07.11
15 iyul 2011-ci il tarixində İçərişəhər "Cümə” məscidinin
imam-camaatı Hacı İlqar İbrahimoğlunun imamlığı ilə möminlər və
möminələr növbəti cümə namazını qıldılar. Cümə namazının azanı
səsləndikdən dərhal sonra mömin və möminələr cümə xütbələrini
dinlədilər.
Cümə xütbələrinin ilkində cümə xətibi, o
cümlədən, ilk olaraq özünə və sonra cümə namazı iştirakçılarına ilahi
təqvaya riayət etməyi tövsiyə etdi. Bu işdə Allahdan tofiqat diləyən
xətib, artıq az qala Şaban ayının yarısının arxada qaldığını, qarşıdan
zəmanə İmamının (ə.f) mövludunun yaxınlaşdığını diqqətə çatdırdı. Sonra
xətib İmam Əlidən (ə) bir mübarək hədisi xatırlatdı: "Özünü göstərməyi kənara at, təkəbbürünü yerə qoy və qəbrinin fikrini çək”.
Hədisin şərhində Hacı İlqar hər üç nöqtəni ayrı-ayrılıqda izah etdi.
Onlardan ikisinin mənəvi mərəz, sonuncunun isə bu mərəzlərdən
qurtulmaq üçün praktiki məsləhət olduğunu bildirdi: "İnsanın özünü
göstərməsi, təkəbbürlük etməsi - mənəvi mərəzin göstəricisidir. Bu kimi
şeylər insanı dünyaya bağlayar və axirəti unutdurar. Bununla da insanlar
zəlil olarlar. Ona görə İmam Əli (ə) bunlardan qurtulmağı və qəbri yada
salmanı tövsiyə edir. Bu, mərəzdən qurtulmaq üçün praktiki
məsləhətdir. İnsan gərək özü ilə tək qalsın və bir gün qəbirdə də tək
qalacağını düşünsün. Hər gün bir yaxınımız dünyasını dəyişir və bir gün
biz də dünyamızı dəyişəcəyik. Düşünsək, başa düşərik ki, orada bizim
dadımıza çatan ancaq əməllərimiz olacaq. Allah bizi təkəbbürlükdən və
özünü göstərmədən qorusun”.
İkinci xütbədə ilk öncə
müsəlmanlar üçün Uca Rəbdən bağışlanma və əfv diləyən xətib, özünə və
hər kəsə ilahi təqvaya riayət etməyi tövsiyə etdi. Xətib israrla
vurğuladı ki, əgər ilahi təqva olmasa, insanın həyatı tamamən mənadan
məhrum olan bir nəsnəyə çevrilər.
Xütbənin davamında dünyada
və ölkədə baş verən hadisələrə toxunan xətib, mübarək Ramazan ayının
yaxınlaşdığını qeyd etdi: "Mübarək Şaban ayının artıq demək olar ki,
yarısı arxada qalıb. Diqqət etsək görərik ki, Ramazan ayı qısa bir
müddətə daxil olacaq. İndidən hazırlaşmaq lazımdır. İnsanlar maddi
məsələlərdə əvvəllcədən çox götür-qoy edir. Bir ay əvvəldən hazırlaşır.
Xırdalıqlarına fikir verir. Təəssüflər olsun ki, mənəvi məsələlərdə belə
deyil. İnsanlar elə bilir ki, mənəvi məsələlər öz-özünə həll olur.
Ancaq tam əksi olmalıdır. Mənəvi işlərimizdə çox diqqətli olmalıyıq.
Daha ətraflı fikirləşməliyik. Ramazan ayına da gərək indidən hazırlaşaq.
Yoxsa Allah eləməsin, bir də görərik ki, ay bitdi, biz isə heç nə
etməmişik”.
Sonra xətib hicab probleminin həlli üçün
"100-minlik imzatoplama kampaniyası”ndan danışdı. O imzatoplama
kampaniyasında zəhmətləri keçən hər kəsə öz təşəkkürümü bildirdi: "Çox
önəmli günləri yaşayırıq. Böyük fədakarlıqlar edilir. Kampaniya davam
edir. Çox qısa bir vaxta uzun bir yol qət edilib, əlhəmdulillah. Daha da
gözəl edilər, inşəallah. Belə görünür ki, möminlər Nimeyi-Şabana
qədər nəzərdə tutduğumuzun təxminən iki qatını toplayacaqlar. Zəhmətləri
keçən hər kəsdən etdiklərini "Allah qəbul etsin!” deyirəm”.
Cümə xətibi eyni zamanda maneələrin də olmasını istisna etmədi:
"Hər bir iş vaxtı müəyyən xırda problemlər çıxa bilər. Fitnələr də ola
bilər. Keçən həftə qeyd etmişdik, indi də bütün inanc əhlindən xahiş
edirəm, fitnələrə getməsin. Mübahisələrə girməsin. Fitnə yaymaqla bağlı
dinimizin harambilmə hökmünə ciddi yanaşsın”.
Xütbənin davamında xətib buyurdu: "Diqqət etməliyik ki, mənəviyyat və əxlaq birinci yerdə olsun. Əxlaqsız din yoxdur. Kəmiyyətcə
artımın keyfiyyət artımı ilə müşayiət olunmasına diqqət edək. Batilin
və mənəviyyatsızlığın aramızda yer almasına yol verməyək. İnanc
mühitinin daxili müqəddəsliyini, səmimiliyini, Əli (ə) əxlaqını göz
bəbəyimiz kimi qoruyaq. Digər mühitlərdən əldə edilən vərdişlərin inanc
mühitinə gətirilməsinə yol verməyək. Milli və dini keyfiyyətliliyə xələl
gətirən işlərdən uzaq olaq”.
Sonda Hacı İlqar hicab məhbusları haqqında da danışdı:
"Hicaba görə tutulan, hal-hazırda həbsdə olan qardaşlarımız - bizim
doğmalarımızdır. Onların tez bir zamanda azadlığa çıxması məsələsini
qaldırırıq. Bunun üçün əlimizdən gələn hər bir iş görülür. Onlar vicdan
məhbusudurlar və çalışılır ki, bu statusda rəsmən tanınsınlar”.
Xütbələr yekunlaşdıqdan sonra Hacı İlqar İbrahimoğlunun imamlığı ilə
mömin və möminələr cümə namazını qılmış, zikrlər, dualar etmiş,
salavatlar zikr etmiş, sonda "Fərəc” duasını oxumuşlar.
/Deyerler.org/
|
