.

Xanım Fatimeyi-Zəhra (s.ə) ilə Xanım Zeynəb (s.ə) haqqında az da olsa məlumatımız olduğu üçün, o biri xanımların həyatına nəzər salaq.

İmam Həsənin (ə) qızı Fatimə (s.ə) nübuvvət ailəsinin iftixar etdiyi qadınlardandır. Bu xanım İmam Hüseynin (ə) gəlini, İmam Səccadın (ə) həyat yoldaşı və İmam Baqirin (ə) anasıdır. Onun İmam Baqirdən (ə) başqa Abdullah adında da oğlu olmuşdur. O, böyük fəqih, fazil və hədis nəql edən olmuşdur. Xanım Fatimənin (s.ə) təqvası o qədər çox idi ki, bu haqda İmam Baqir (ə) və İmam Sadiq (ə) çox bəhs etmişdilər. İmam Baqir (ə) buyurur: "Anam divarın yanında əyləşmişdi. Birdən divar çatladı və aşağı tökülməyə başladı. Anam əli ilə divara işarə edib dedi: "Yox, Mustafaya (s) and olsun ki, Allah sənə icazə verməmişdir”. Divar göydən asılı vəziyyətdə qaldı. O zamana qədər ki, anam kənara çəkildi”.

İmam Sadiq (ə) bu xanım barədə buyurur: "İmam Həsənin (ə) nəslində onun kimi qadın tapılmaz”.

İsmət və təharət nəslinin başqa bir nümunəvi qadını - İmam Kazımın (ə) qızı Fatimeyi Məsumədir (s.ə). İmamlarımızın (ə) bir neçəsi bu xanımın ziyarətini çox tövsiyə etmişdilər. İmam Sadiq (ə) bu haqda buyurur: "Həqiqətən, biz Əhli-beytin (ə) hərəmi vardır və o, Qumdadır. Orada övladımın qızlarından dəfn olunacaqdır ki, adı Fatimədir. Hər kim onu ziyarət edərsə, behişt ona vacib olar”. İmam Rza (ə) buyurur: "Hər kim onun haqqını tanıyaraq ziyarət edərsə, behişt onun üçündür”.

İslamın nəzərinə görə nümunə qadınlardan biri də İmam Cavadın (ə) qızı xanım Həkimədir (s.ə). Bu xanım, atasının imamətinin, qardaşının və qardaşı oğlunun dövrünün şahidi olmuşdur. İmam Cavadın (ə) imamət dövrü İmam Hadi (ə) və İmam Həsən Əsgərinin (ə) İmamət dövründən daha ağır idi. İmam Hadini (ə) və oğlu İmam Həsəni (ə) hərbi mərkəzdə nəzarət altında saxlayırdılar. Ona görə də onlara Əsgəri ləqəbi verilmişdi. Həkimə xanımın (s.ə) İmam Həsənin (ə) sirdaşı olması və İmam Zamanın (ə.f) dünyaya gəlişində iştirak etməsi xanımın təqvasından və imanın yüksəkliyindən xəbər verir. Həzrət Həkimə (s.ə) Nərcis (s.ə) xanımın müəllimi olmuşdur. Bu romalı xanım Həkimə (s.ə) xanımın köməyi ilə kamil müsəlman olmuşdur. İmam Həsən Əsgəri (ə) Həkimə xanımdan (s.ə) istəyir ki, Nərcis xanımı (s.ə) İslam dini ilə tanış etsin. Ona buyurur: "Ey Rəsullahın qızı! Nərcisə dini əhkamı kamil şəkildə öyrət”. İmam Hadi (ə) isə Həkimə xanıma (s.ə) buyurur: "Nərcisi Əbi Muhəmmədə (ə) ver! Allah istəyir ki, sən bu işdə şərik olasan”.

Xanımın İmam Zaman ağanın (ə.f) dünyaya gəlişində də iştirak etməsi onun uca məqamından xəbər verir. İmam Həsən Əsgəri (ə) özü şəxsən xanımı evinə dəvət edir və ona xəbər verir ki, tezliklə İmam Zaman ağa (ə.f) dünyaya gələcəkdir. Bir çoxları İmamın (ə) varlığından xəbər tutmaq üçün xanıma müraciət edərdilər.

Bu deyilənlər Məsumların (ə) ailəsində böyümüş xanımların fəzilət dənizindən bir damcı idi. Bu xanımların təqvası və imanı hər şeydən əvvəl nəzəri cəlb edir. İslam dini də həmişə təqvaya dəyər vermişdir. Hər kimin təqvası varsa, o, daha əziz hesab edilər. İstər qadın olsun, istərsə də kişi.

(Tebyan/ Deyerler.org)