8
iyul 2011-ci il tarixində İçərişəhər "Cümə” məscidinin imam-camaatı
Hacı İlqar İbrahimoğlunun imamlığı ilə möminlər və möminələr növbəti
cümə namazını qıldılar. Cümə namazının azanı səsləndikdən dərhal sonra
mömin və möminələr cümə xütbələrini dinlədilər.
Cümə xütbələrinin
ilkində cümə xətibi, o cümlədən, ilk olaraq özünə və sonra cümə namazı
iştirakçılarına ilahi təqvaya riayət etməyi tövsiyə etdi. Bu işdə
Allahdan tofiqat diləyən xətib, artıq Şaban ayının bir neçə gününün
arxada qaldığını, şəbaniyyə mövludlarının keçdiyini diqqətə çatdırdı. Xütbənin
davamında xətib mənəvi üçaylıqda əxlaq məsələlərinə xüsusən diqqət
etməyin vacibliyini vurğuladı. O, bu dönəmin əxlaqi rəzilətlərdən
qurtulmaq üçün uğurlu fürsət olmasına diqqət çəkdi. Sonra xətib İmam
Əlidən (ə) bir mübarək hədisi xatırlatdı: "And olsun Allaha, dilini
qorumayınca təqvasının xeyir verdiyi bir bəndə tanımıram”. Hədisin
şərhində Hacı İlqar dili qorumağın nələr olduğunu izah etdi: "İnsanın
dili, yəni danışdığı söz - çox önəmlidir. İnsan öz düşüncəsini,
fikirlərini sözlər və sözləri də dil vasitəsi ilə insanlara çatdırır. Bu
baxımından dilimizin neçə olması çox vacibdir. "Dili qorumaq”, əslində
danışığını, sözünü, fikrini, düşüncəsini qorumağa işarədir. Ola bilər
ki, insan heç danışmasın, öz fikrini yazı ilə, gözü, əl işarəsi ilə
çatdırsın. Bunları da qorumaq lazımdır”. "Bəs insan dilini nədən
qorumalıdır?” sualını qoyan imam-camaat, bunları bildirdi: "İnsanın dili
önəmlidir ona görə ki, bəzən bu dil insanın ağlına, bəzən də nəfsinə
qulaq asır. Allah bəndələrinə iddia edənlərin hər mənada "dil”ləri
nəfslərinə qulaq asmamalıdır. Öz gücünü nəfsdən götürən dilin sahibi
təqvadan xeyir götürə bilməz. İmam Əli (ə) buyurur ki, təqvanın dünyaya
vurğun qəlbdə yerləşməsi haramdır. Hər kəs özünü bu mənada tərbiyə
etməlidir. Biz çox vaxt maddi rahatlıqları özümüzə məqsəd bilirik. Ev
üçün çalışırıq, maşın almaqda yarışırıq, enerjimizi, vaxtımızı maddi
rahatlıqlara sərf edirik. Dinimiz bunları normal sayır bir halda ki,
vasitə biləsən, məqsəd bilməyəsən. Bilmək lazımdır ki, bunlar bizi
xeyirli axirətə aparırsa - gözəldir. Aparmırsa - dünyapərəstlikdir. Və
dünyapərəstlərin qəlbində təqvaya yer yoxdur. Bu, böyük bir mənəvi
xəstəlikdir. Xüsusən də yeniyetmələr və gənc nəsil üçün bu məsələ daha
aktual olmalıdır. Çünki, gənc olanda belə xəstəliklər hələ kök atmış
olmur. Pis xüsusiyyətlərdən daha tez qurtulmaq mümkündür. Sadəcə
özümüzlə məşğul olmağa vaxt ayırmalıyıq””. Davamında cümə xətibi
bildirdi: "Bəzən belə fikirlər gəzir ki, alimlərimiz və ariflər hər gün
mənəvi durumları ilə ona görə çox məşğul olurlar ki, vaxtları var. Xeyr,
belə deyil. Yalnış təsəvvürdür. Onlar az işlə məşğul olmurlar. Sadəcə
onlar öz durumları ilə vaxtları olanda yox, vaxt ayırıraraq məşğul
olurlar. Gərək şəxsi tərbiyə üçün vaxt ayırasan. Heç kimin boş vaxtı
yoxdur. Olmayacaq da. Vaxt olmur. Onu məntiqlə və iradə ilə
ayırmalısan”. Cümə xətibi bunun üçün praktiki mənəvi məsləhətlərə də
toxundu: "İnsan qərar verərkən öz mənfəətini düşünürsə, bu,
qərarvermədə ona maneə olur. Bundan qurtulmağın yolu – diriykən özünü
ölü bilməkdir. İnsan diriykən, gərək özünü ölü bilsin. Ölməyi bacarsın.
İnsan diriykən özünü ölü bilsə, artıq nəfsi də olmayacaq. Artıq daha
rahat fikirləşə biləcək. Qərar qəbulunda nəfsi ona mane olmayacaq.
Ölüdür, axı! Ölü insan kənardan baxıb nəyin neçə getməsini daha yaxşı
dəyərləndirə bilir. Və öz mənfəətini güdməz. Ölüdə "mən” olmur. Allahdan
qəlblərimizin təqvalı olmasını, dünyapərəst olmamasını diləyirəm”. İkinci
xütbədə ilk öncə müsəlmanlar üçün Uca Rəbdən bağışlanma və əfv diləyən
xətib, özünə və hər kəsə ilahi təqvaya riayət etməyi tövsiyə etdi. Daha
sonra vurğuladı ki, əgər ilahi təqva olmasa, insanın həyatı boş və
mənasız bir şeyə çevrilər. Xütbənin davamında dünyada və ölkədə baş
verən hadisələrə toxunan xətib, hicab probleminin həlli üçün "prezidentə
100-minlik imzatoplama kampaniyası”ndan danışdı: "Mən əvvəlcə öz
təşəkkürümü bildirmək istəyirəm. O insanlara ki, imzatoplama
kampaniyasında zəhmətləri keçir. Əziyyət çəkirlər. Kampaniya davam edir.
Çox qısa bir vaxta uzun bir yol qət edilib, əlhəmdulillah. Daha da
gözəl edilər, inşəallah. Bu, bizim aqibət məsələnmizdir. "Sən hicab
qadağasının götürülməsi üçün nə etdin?” sualına ixlaslı cavablardandır”. Xətib
eyni zamanda kampaniyaya olan dəstəklərdən də danışdı: "Kampaniyaya
böyük dəstək var. Ölkə insanları, inanclısı, qeyri-inanclısı - hər biri
dəstək verir. Bölgələrdən dəstəklər gəlir. Hövzələrdə təhsil alan
qardaşlarımızdan dəstək gəlib. Haqq Yolu Elm və Mədəniyyət İnstitutundan
(HYEMİ), Hicab və Hicab Qadağası Məhbuslarını Müdafiə Komitəsindən
(HHQM MK), Mübariz Ruhanilər Cəmiyyətindən (MRC) dəstək gəlib.
"Beynəlxalq Əhli-Beyt (ə) Assambleyası”nın baş katibi Höccətülislam
vəl-müslimin Əxtəridən kampaniyaya dəstək gəlib. Bu şəxsiyyətin ali
məqamlı mərcəiyyətin yanında nə qədər böyük önəm daşıdığı hər bir
fəzilət sahibinə gün kimi aydındır. Bunlar bizi çox sevindirdi. Bu
dəstəkləri bir ilahi rəhmətin və tofiqatın təzahürü kimi
dəyərləndiririk”. Daha sonra kampaniyanın ümumi gedişindən danışan
xətib vurğuladı ki, əslində bu, Allahın bizə tofiqatıdır: "Biz qəti
əminik ki, bu, Allahın bəndələrinə rəhmindən və lütfündən başqa bir şey
deyil. Ən böyük lütf ondadır ki, insanlarımızın mütləq əksəriyyəti bizi
başa düşür. Nəinki sadəcə dəstəkləyir, əslində bunu bir ilahi vəzifə və
təklif kimi dəyərləndirir”. Cümə xətibi eyni zamanda fitnələrin də
olmasını istisna etmədi: "Hər bir iş vaxtı müəyyən xırda problemlər çıxa
bilər. Fitnələr də ola bilər. Bütün inanc əhlindən xahiş edirəm
fitnələrə getməsin. Mübahisələrə girməsin. Fitnə yaymaqla bağlı
dinimizin harambilmə hökmünə ciddi yanaşsın. Günah bilsin”. Sonda
Hacı İlqar hicab məhbusları haqqında danışdı: "Hicaba görə tutulan,
hal-hazırda həbsdə olan qardaşlarımız bizim doğmalarımızdır. Onların
azadlığa çıxması üçün əlimizdən gələn hər bir iş görülür. İnşəallah,
vicdan məhbusu kimi rəsmən tanınmalarına nail olmağa çalışılır. Bu
istiqamətdə də ciddi irəliləyişlərin olmasına ümidliyik”. Xütbələr
yekunlaşdıqdan sonra Hacı İlqar İbrahimoğlunun imamlığı ilə mömin və
möminələr cümə namazını qılmış, zikrlər, dualar etmiş, salavatlar zikr
etmiş, sonda "Fərəc” duasını oxumuşlar.
/deyerler.org/
|