.

İmam Əli (ə) buyurur: "Qadının qeyrəti küfrdür, kişinin qeyrəti isə imandır”. Bəlkə bu hədisi ilk dəfə eşidən zaman onu həqiqətini dərk etmək çətin olur. Ancaq bir qədər düşünəndən sonra görmək olur ki, İmam (ə) heç də qadınlara qarşı ayrı-seçkilik etmir.

Bu nöqtəyə diqqət etmək lazımdır ki, iman və küfr, etiqad hissəsinə və əməli hissəyə bölünür. Mümkündür ki, bir insan etiqad baxımından bir mövzunu qəbul edər, ancaq əmələ gəldikdə onu yerinə yetirməz. Bu zaman əməldə küfrə düçar olar. Bu küfr etiqad küfrü deyildir. Ancaq mömin insan həm etiqad və həm də əməldə kamil olmalıdır. Bu hədisdə də məhz əməldəki küfr nəzərdə tutulur.

İmam Əli (ə) buyurur: "Ehtiyatlı ol ki, o yerdəki qeyrət göstərməməlisən, qeyrət zahir edəsən. Çünki sui-zənnə, etimadsızlığa, qadınların iffətsizliyinə, günahsızların çirkinliklərə tərəf sövq edilməsinə səbəb olar”.

İmam Əli (ə) bu hədisdə psixolqların mühüm mövzusuna işarə edir ki, bir çox kişilər qadınlarına qarşı yersiz qeyrət göstərirlər. Onları ictimai fəaliyyətlərdən saxlayırlar. İmam (ə) bu məsələni tənqid edir.

Həzrət (ə) başqa yerdə buyurur: "Hər kəsin ölçüsü - hümməti ölçüsündədir. Hər kəsin sədəqəsi - şəxsiyyəti ölçüsündədir. Hər kəsin şücaəti - zöhdünün ölçüsündədir. Hər kəsin iffəti - qeyrəti ölçüsündədir”.

Dini qeyrətin özü - ən dəyərli nemətlərdəndir. Elə müsəlmanlar vardır ki, dini müqəddəslərinə həqarət edilməsinə baxmayaraq, heç bir reaksiya vermirlər. Ölülər kimi hərəkətsiz və hissiz dururlar.

Beləliklə, deyə bilərik ki, kişilərin yerində qeyrət göstərməsi - imanının nişanəsidir. Bir müsəlman həm həyat yoldaşına və həm də dininə qarşı qeyrətli olmalıdır. Qadının qeyrət göstərməsi - əməli küfrdür. Belə ki, İmam Sadiq (ə) bu məsələni belə açıqlayır: "Qadınları qeyrəti - paxıllıqdandır və paxıllığın kökü - küfrdür. Qadınlar qeyrət və qısqanclıq çəkəndə qəzəblənirlər. Qəzəbləndikdə isə küfrə meyl edirlər. Yalnız müsəlman qadınlardan başqa”.

(Tebyan/ Deyerler.org)