Qadın və geyim
Qadının azadlığı və hüqüqlarının müzakirəsində geyim mövzusu şübhəsiz ki, ən önəmli məsələlərdən biridir.
Bu gün də geyim mövsunun müzakirəsində hicab məsələsi öz əhəmiyyətini
və həssas yerini qorumaqdadır. Bəziləri hicabın qadına maneələr
yaratdığını iddia etsə də, bacardığım müstəvidə bunun belə olmadığını
aşkar etməyə çalışacağam.
Əvvəla tariximizə nəzər salsaq istər siyasi həyatda, istərsə də digər
sahələrdə Azərbaycan qadınlarının müstəsna rolları danılmazdır. Bu
qadınlardan sadəcə bir neçəsini xatırlatmaq istərdim. Sara Xatun öz
dövrünün çox məşhur siyasi xadimi, həmçinin Şərqin ilk diplomak qadını
adına malik olmuşdur. Özünəməxsus qəzəlləri ilə bu gün də
ədəbiyyatımızda tədris olunan Xurşudbanu Natəvan da yəqin ki hamıya öz
əxlaqı, geyimi bir sözlə milli-mənəvi dəyərlərimizə sadiqliyi ilə
tanınmışdır.
Nə qədər bu gün keçmişini unutmuş bəziləri, "bizim nənələrimiz də heç
örtük örtməyib” desələr də, verdiyimiz iki nümünə məncə yetərlidir.
Ancaq Qurani Kərimdə də buyurulduğu kimi "Onlar Allahın ayələrini ucuz
qiymətə satır və (insanları) Onun yolundan döndərirdilər. Onların
tutduqları iş necə də pisdir!” (Tövbə surəsi-9)
Əslində isə iman gətirənlər üçün Allahın bizə açıq-aydın dəlil şəklində
Hz Məhəmməd(s.a.v.s) vasitəsilə nazil etdiyi iki ayə yetərlidir.
Quranda, iki ayədə ("Nur” surəsinin 31-ci ayəsi və "Əhzab” surəsnin
59-cu ayəsi) qadın geyimi haqqında lazım olan göstərişlərin olduğunu
görürük.
1. "Nur” surəsi 31 ci ayə:
”Mömin qadınlara de ki, gözlərini haram buyurulmuş şeylərdən
çevirsinlər (naməhrəmə baxmasınlar), ayıb yerlərini (zinadan) qorusunlar
(və ya örtülü saxlasınlar), öz-özlüyündə görünən (əl, üz) istisna
olmaqla, zinətlərini (zinət yerləri olan boyun, boğaz, qol, ayaq və s.
naməhrəmə) göstərməsinlər; baş örtüklərini yaxalarının üstünə çəksinlər
(boyunları və sinələri görünməsin)”
2. "Əhzab” surəsi, 59-cu ayə:
"Ya Peyğəmbər! Zövcələrinə, qızlarına və möminlərin xanımlarına de ki,
örtüklərini (sinələrini örtəcək şəkildə) örtsünlər. Bu onların (iffətli)
tanınması və onlara əziyyət verilməməsi üçün daha münasibdir. Allah
bağışlayandır, rəhm edəndir!”
Bütün bu sadalananlardan sonra da məlum olur ki, İslam dinində qadının
geyimi çox önəmli məsələlərdən biridir. Hicabı Avropa qadınlarının
geyimləri şəklinə salmaq istəyənlərin isə, yenə də düşünmək üçün
vaxtları vardır. Axı biz "başımızda” Quran ayəsi daşıyırıq. Onu gülməli,
əcaib şəkillərə salmağa nə ehtiyac var?
Bəzən hicab taxan xanımların geyimi heç də hicab haqqında, örtük
haqqında məlumatı olmayan qadınların geyimindən fərqlənmir. Yaxsi, biz
sabah onların qarşısına çıxıb: "Bacı hicab vacibdir” desək, görəsən bizə
ünvanlanan "axı bizim aramızda heç də böyük bir fərq yoxdur” sualının
qarşısında nə edərik?
Hicab, sadəcə bədənin istənilən şəkildə örtülməsini əmr etmir. Örtünmə
dedikdə yalnız görünməmək deyil, həm də bilinməmək mənası ifadə olunur .
Çox hallarda qadınlar, bilərək və ya bilməyərək hicabın doğru olmayan
şəkillərə gətirilib çıxarılmasına səbəb olurlar.
Əziz bacım, hicab bizə Xanım Zəhra(s.ə) əmanətidir. Onu qorumaq bizə
vacibdir. Bir anlıq düşünün ki, gündəlik həyatda geyindiyiniz hicab
geyimi ilə Xanım Zəhra(s.ə) ilə qarşılaşsanız necə olarsınız? Alın
açıqlığı ilə "mən Sənin əmanitini qorudum Ya Zəhra” deyə bilərsiniz?
Yoxsa heç bir yerində Allahın nəzərindən qaça bilməyəcəyimiz bir dünyada
gizlin yer axtararsınız?
Getdiyimiz bu yol Allahın bizə haqq deyə tanıtdırdıgı yoldur. Elə isə
Ondan qeyrisinə bəndə olmayaq! Dünya və axirətimizi bir günlük gözəl
görünməyin xatirinə satmayaq!
P.S. Axı qadınlar cənnəti ayaqlarının altına sərən Rəbbinə şükr etməkdə bu qədər aciz olmamalıdırlar.
Günel Şirinova
İslam-Azeri.az İnternet qəzetinin müxbiri
| 
