Könül Quliyeva: "Psixoloqların gəldiyi qənaətə görə, adın insanın şəxsiyyətinə, formalaşmasına müəyyən təsiri var”
�
"Bəzən uşaqlara elə adlar qoyulur ki, bu adlar ya zalım, tarixdə pis
iz qoymuş diktatorların adlarıdır, yaxud da heç bir mənası olmayan
adlardır”
�
Beynəlxalq hüquq normalarında yer alan mövzulardan biri də uşaq
haqlarıyla bağlıdır. Qanunvericiliyimizə görə, 18 yaşınadək vətəndaşlar
uşaq sayılır və onların da böyüklər kimi bir sıra hüquqları var. Amma
araşdırmalar göstərir ki, ölkəmizdə də uşaq hüquqları qanunla qorunsa
belə bir çox hallarda pozulur və bu hal daha çox ailələrdə yaşanır.
Əhalimizin böyük əksəriyyətinin islam əqidəli olduğunu nəzərə alaraq
dinimizin uşaq hüquqlarına münasibətini öyrənmək üçün suallarımızı
"Mənəvi Saflıq” jurnalının baş redaktoru, ilahiyyatçı Könül Quliyevaya
ünvanladıq.�
– Dünyəvi qanunvericilikdə uşaq hüquqları yer alır. Bəs islamın da uşaq hüquqlarını müdafiə etdiyini deyə bilərik?
– Ümumilikdə islam dinində istər canlı, istərsə cansız bütün
varlıqların haqları qorunur. Təbii ki, yaradılışın ən ali nümayəndəsi
olan insanın haqlarına daha çox önəm verilir. Cəmiyyətin ən çox
himayəyə, qayğıya möhtac hissəsi olan uşaqlar da bu məsələdə istisna
deyil. Dinimizdə uşaqların aşağıdakı hüquqları var:
a) Hər bir uşağın yaşama hüququ var. Müasir cəmiyyətdə təbliğ olunan
bu hüquq 15 əsr öncə islam dinində öz əksini tapıb. Maraqlıdır ki,
dinimizdə uşaq dünyaya gəlmədən öncə belə hələ ana bətnindəykən yaşamaq
hüququ əldə edir. Hətta rəbbimiz dünyaya gəlməyən, ana bətnində olan
uşaqları öldürməyi qadağan edir. Bəzən valideynlər kasıbçılığı,
yoxsulluğu bəhanə gətirərək ana bətnində olan övladlarını qətlə
yetirirlər. Allah bu əməli qətiyyətlə pisləyərək, yoxsulluq bəhanəsilə
övladını hələ dünyaya gəlməmiş məhv edən valideynlər üçün
"Qurani-Kərim”də buyurur: "Yoxsulluqdan qorxub övladlarınızı öldürməyin.
Biz onların da, sizin də ruzinizi veririk. Onları öldürmək, həqiqətən,
böyük günahdır!” (Surə 17, ayə 31).
b) Gözəl ad qoyulması. Uşağa gözəl və mənalı ad vermək valideynin
övlad qarşısındakı vəzifələrindəndir. Bu gün psixoloqların gəldiyi
qənaətə görə, adın insanın şəxsiyyətinə, formalaşmasına müəyyən təsiri
var. Maraqlıdır ki, bu fikir dinimizdə əsrlər öncə qeyd olunub və uşaq
hüquqlarından birinə çevrilib. Sevgili peyğəmbərimizin həyatına nəzər
saldıqda görürük ki, islamdan əvvəl ad verilmiş bəzi səhabələrin adları
dəyişdirilərək daha anlamlı, gözəl adlarla əvəz edilib. Yeri gəlmişkən,
bəzən uşaqlara elə adlar qoyulur ki, ya bu adlar zalım, tarixdə pis iz
qoymuş diktatorların adlarıdır, yaxud Allah, Tanrı mənasını ifadə edən
adlardır (məsələn, İlahə), yaxud da heç bir mənası olmayan adlardır.
Dinimizə görə, valideynin övladına bu cür adlar verməsi doğru sayılmır.
c) Hər bir uşağın halal ruzi haqqı var. Rəbbimiz hər bir insanın
ruzisini verir. Uşaq dünyaya gəldiyi andan Allah anası vasitəsilə ona
çox xeyirli və münasib bir qidanı – ana südünü yetirir. Sevgili
peyğəmbərimizdən rəvayət olunan bir hədisdə buyurulur: "Körpə üçün ana
südündən xeyirli bir qida yoxdur”. Sonrakı mərhələlərdə də dinimiz
uşaqların qidalandırılması və zəruri ehtiyaclarının ödənilməsinin
valideynin, xüsusilə atanın məsuliyyəti olduğunu bildirir. Bu məsələylə
bağlı Həzrəti Məhəmməd (s.ə.s) belə buyurur: "Uşağın atası üzərində olan
haqlarından biri də onu halal ruzi ilə qidalandırmasıdır”.
ç) Tərbiyə hüququ. Övladlarımız Allahın ata-anaya hədiyyəsi və
əmanətidirlər. Uşaqlar həm də bizim gələcəyimizdirlər. Onlara gözəl
tərbiyə vermək, bir şəxsiyyət kimi yetişdirmək valideynin mühüm
vəzifələrindəndir. Uşağı həyata hazırlamaq, ona gözəl əxlaq, elm
öyrətmək ata-ananın övladına verdiyi ən gözəl sərvətdir. Bu, ata-ananın
valideynlik vəzifəsi, övladın ata-ana üzərində olan bir haqqıdır.
Sevgili peyğəmbərimiz buyurur: "Bir ata övladına yaxşı tərbiyədən daha
gözəl bir sərvət qoymayıb”. İslam dini elm öyrənməyə çox önəm verir.
Dinimizə görə, elm öyrənmək hər bir qadına və kişiyə vacibdir. Bu
baxımdan uşaqlar da istisna deyil. Övladlarına elm öyrətmək, onu
cəmiyyətə layiqli insan kimi yetişdirmək valideynin vəzifələrindəndir.
Həzrət Əli (ə) uşaqların elm öyrənməsi, təlim-tərbiyəsi ilə bağlı
buyurur: "Övladlarınızı onların zəmanəsinə uyğun tərbiyə edin”. Yəni
burada valideynin üzərinə çox böyük məsuliyyət düşür. Valideyn nəinki öz
zəmanəsinin elmlərindən xəbərdar olmalı, hətta gələcək barədə
futuroloji proqnoz verməyi bacarmalıdır ki, övladlarını həmin dövrə
uyğun şəkildə tərbiyə edə bilsin.
– "Qurani-Kərim”də uşaqla bağlı hansı ayələr var?�
– "Qurani-Kərim”də peyğəmbərlərin uşaqlıqları – İsa (ə), Musa (ə),
Yəhya (ə), Həzrəti Məhəmməd (s.ə.s) və digər peyğəmbərlərin uşaqlıq
dövrlərindən, yetimlərin haqlarından söhbət açan bir çox ayələr
mövcuddur.
– Bu gün cəmiyyətimizdə oğlan-qız ayrı-seçkiliyi salan ailələr var. İslamın belə bir yanaşmaya münasibəti necədir?�
– Bilirik ki, islam dinindən öncə bütünlükdə dünyada qadına
münasibət mənfi idi. Qədim Hindistanda əri dünyasını dəyişən qadın həyat
yoldaşı ilə birlikdə basdırılırdı. Cahil ərəblər arasında qadın bir
dəvə qədər hörmətə malik deyildi. Qız övladının olduğunu bildikdə bədəvi
ərəblər çox utanar və qız uşaqlarını diri-diri torpağa basdıraraq
öldürməkdən çəkinmirdilər. Rəbbimiz "Qurani-Kərim”də buyurur: "Onlardan
birinə … (qız uşağı) ilə müjdə versən, qəzəbdən boğularaq üzləri qapqara
qaralar”. (Surə 43, ayə 17). Təəssüflər olsun ki, bəzən XXI əsrin
insanı XV əsr öncə yaşamış bədəvi ərəb kimi övladını öldürməyə razı
olur. İslam dini hansı vasitəylə olur-olsun övladlarını öldürən
valideynləri qınayır və dinimizə görə, xüsusi zəruri hallar olmadan
abort günah sayılır. Bəli, bəzi insanlar forma etibarı ilə dəyişirlər,
düşüncə mahiyyət etibarı ilə isə elə keçmişdəki cahil insanlardan
fərqlənmirlər. Allah "Qurani-Kərim”də buyurur: "Göylərin və yerin hökmü
Allahın əlindədir. O, istədiyini yaradır, istədiyinə ancaq qız,
istədiyinə də ancaq oğlan verir. Yaxud hər ikisindən – həm oğlan, həm də
qız verir, istədiyini də sonsuz (övladsız) edir. O, (hər şeyi)
biləndir, (hər şeyə) qadirdir!” (Surə 42, ayə 49-50).�
– İslamda övladın qız-oğlan olmasının fərqi varmı?
– Təbii ki, islam dininə görə, qız və ya oğlan övladı arasında
ayrı-seçkilik salmaq, birini digərindən üstün tutmaq doğru deyil.
Dinimizdə uşağın oğlan, yaxud qız olması deyil, əməlisaleh və həm ailə,
həm də cəmiyyət üçün xeyirli övlad olması önəmlidir. Həzrəti Məhəmməd
(s.ə.s) uşaqlar arasında ayrı-seçkilik salanlar barəsində buyurur:
"Allahdan qorxun, uşaqlarınız arasında ədalətli davranın”. İmam Sadiq
(ə) isə deyib: "Oğlanlar nemət, qızlar isə rəhmətdir (yaxşılıqdır).
Allah nemətlərə görə sorğu-sual edər, yaxşılıqlara görə isə mükafat
verər”. Bir çox hallarda milli mentalitetdən irəli gələrək valideynlər
oğlan övladının olmasını istəyirlər ki, bu övlad vasitəsilə nəsil davam
etdirilsin. Tarixdən məlum olduğu kimi, islam peyğəmbərinin oğlan övladı
yox idi və cahil ərəblər onu təhqir edərək sonsuz adlandırırdılar.
Lakin Allah "Quran”da "Kövsər” surəsini nazil etməklə cəmiyyətdəki bu
kimi səhv düşüncənin qarşısını aldı.�
– Araşdırmalara görə, uşaqların hüquqları daha çox ailədə pozulur.
Bir çox hallarda uşaqlar valideynləri tərəfindən şiddətə məruz qalırlar.
İslamın ailədə uşağa qarşı zorakılığa münasibəti necədir?�
– İslam dini istər ailədə, istərsə də cəmiyyətdə olan hər cür
zorakılığı pisləyir. Şübhəsiz ki, uşaqların tərbiyə olunmasında
xoşrəftarlıq, mərhəmət, sevgi ən mühüm amildir. Bu cür yanaşma tərbiyədə
düzgün şəkildə istifadə olunarsa, ailədə əsl şəxsiyyət yetişdirmək
mümkündür. Allah rəsulu buyurur: "Övladlarınıza ehtiram göstərin və
onların yanında öz əxlaq və rəftarınızı islah edin”. İslam peyğəmbərinin
həyatına nəzər saldıqda onun uşaqlara mərhəmət və sevgi ilə
yanaşdığının şahidi olarıq. Aləmlərə rəhmət olan peyğəmbərimiz yol ilə
gedərkən hətta azyaşlı uşaqlarla belə salamlaşar, onların əhvalını xəbər
alardı. Bir gün islamı yeni qəbul etmiş bir ərəb peyğəmbərin nəvələrini
öpdüyünü görüb çox təəccüblənir: "Mənim on övladım var, amma bu vaxta
kimi onlardan birini də öpməmişəm”. Peyğəmbər heyrətlə ona deyir: "Belə
olar?! Bil ki, mərhəmət göstərməyənə rəhm olunmaz”.
– Həzrəti Məhəmmədin övladlarına, nəvələrinə münasibəti necə olub?
– Sevimli peyğəmbərimizin həyatına nəzər saldıqda qız övladlarının
üzqarası sayıldığı vəhşi bir cəmiyyətdə öz qız övladını qucağına alaraq
əzizlədiyinin, nəvaziş etdiyinin şahidi oluruq. Tarixdən məlumdur ki,
peyğəmbər səfərə çıxarkən son vidalaşdığı, geri qayıdarkən ilk görüşdüyü
şəxs qızı Fatimə olardı. Bəlkə də bəşəriyyət tarixində peyğəmbərimiz
kimi qayğıkeş, mehriban və xoşrəftar baba görünməyib. Peyğəmbər balaca
Həsənlə, Hüseyni qucağına alar, onlar yuxuya gedənə qədər gözləyər, nə
qədər vacib işi olsa belə nəvələrini narahat etməyə razı olmazdı.
Sevinsinlər deyə, kürəyinə alıb evdə dolandırar və "Nə gözəl miniyiniz
var” deyə buyurardı. Hətta bir dəfə peyğəmbər minbərdə xütbə söyləyərkən
balaca Hüseynin ağladığını eşidir, xütbəsini yarımçıq saxlayaraq
minbərdən enir, Hüseyni qucağına alaraq xütbəni beləcə davam etdirir.�
– Uşağın tərbiyəsində kim əsas rol oynayır?�
– Dinimizin göstərişlərinə əsasən, uşaq tərbiyəsində həm ata, həm də
ana iştirak etməlidir. Maraqlıdır ki, islam dini tərbiyəyə uşaq hələ
ana bətnindəykən başlamağı tövsiyə edir. Müasir elmi araşdırmalar da XV
əsr öncə islam dininin bu göstərişinin doğruluğunu təsdiqləyir. Çünki
ananın hamiləlik zamanı keçirdiyi bütün hiss və həyəcanlar övladına
ötürülür. Dinimizə görə, hətta hamiləlik zamanı ananın yediyi qidalar
belə uşağın gələcək inkişafında iz buraxır. Odur ki, dini mənbələrdə
hamilə qadının "Quran”, dualar oxuması, yaxşı insanlarla ünsiyyətdə
olması, pis əməllərdən çəkinməsi tövsiyə olunur. Maraqlıdır ki, hətta bu
dövrdə də atanın rolu nəzərə alınır və bir çox ibadətlər, dualar birgə
yerinə yetirilir. Sonrakı mərhələlərdə də ata və ana övladlarının
tərbiyəsində eyni qədər məsuliyyət daşıyır.�
– Dinimizə görə, ailədə qərar verilərkən uşağın da fikirləri nəzərə alınmalıdırmı?�
– Bəli, dinimizə görə, ailədə qərar verilərkən uşaqların da fikri
nəzərə alınmalıdır. Bu, həm də uşağın şəxsiyyətinin inkişafı,
formalaşması üçün də çox önəmlidir. Lakin təəssüflər olsun ki, milli
mentalitetdən irəli gələrək Azərbaycanda uşaqların fikirləri çox zaman
nəzərə alınmır və valideynlər öz hökmranlığından istifadə edərək hətta
uşaqların fikirlərinə təzyiq göstərirlər.
|