Deyerler.org: İki
aləm xanımı Həzrət Fatimə (s.ə) - Quranın kövsəridir. Onun dünyaya
gəlişini İmam Sadiq (ə) bu cür bəyan edir: "Həzrət Xədicə (s.ə) tənhalıq
hiss edir və nökərini Qureyş qadınlarının yanına göndərir ki, evinə
gəlsinlər və onu tək qoymasınlar. Onlar da nökərə dedilər ki, sən bizim
sözümüzü eşitmədin və Əbu Talibin yetiminə ərə getdin. Ona görə də biz
sənin evinə gəlmirik və bizi gözləmə. Həzrət Xədicə (s.ə) çox pərişan
olur. Bu zaman Bəni-Haşim qadınları kimi uca boylu dörd qadını görür.
Onlar otağa daxil oldular və Həzrət Xədicə (s.ə) qorxmuşdu. Onlardan
biri dedi: "Qəmgin olma, Allah bizi sənə tərəf göndərmişdir. Biz sənin
bacılarınıq. Mən Sarayam, o birisi Məzahimin qızı Asiyadır. Üçüncüsü
İmranın qızı Məryəm və dördüncüsü isə Musanın bacısı Gülsümdür. Allah
bizi göndərmişdir ki, sənə yardım edək”. Sonra da Həzrət Xədicənin (s.ə)
dörd tərəfində qərar tutdular. Həzrət Fatimə (s.ə) bu fani dünyaya
gözlərini açır. Bu zaman ondan bir nur çıxır ki, Məkkənin, şərq və
qərbin evlərini işıqlandırır. Behişt huriləri kövsər suyu ilə daxil
olurlar. Xədicənin (s.ə) qarşısında olan qadın Fatiməni (s.ə) götürür.
Onu süddən ağ və ətirli bir parçaya bükür. Sonra onu danışmağa məcbur
edir. Həzrət Fatimə (s.ə) Allahın təkliyinə, Peyğəmbərin (s) risalətinə,
Həzrət Əlinin (ə) vəsi olmasına və övladlarına şəhadət verir. Sonra
qadınlar Həzrət Xədicəyə (s.ə) dedilər: "Bu qızı götür ki, Tahirə
Mütəhhərədir. Allah onda və övladlarında çox xeyir və bərəkət qərar
vermişdir””.
Həzrət Peyğəmbərin (s) evi o gündən sonra xüsusi İlahi nur ilə
işıqlandı. Həzrət Peyğəmbərin (s) və Həzrət Xədicənin (s.ə) qəlbini
sevindirdi. O gündən sonra Peyğəmbərimiz (s) qızından ayrılmadı və onun
qəminə qəmgin oldu, sevinci ilə sevindi.
