Artıq
"Əyyami-Fatimə (s.ə)" günlərini yaşamaqdayıq. "Əyyami-Fatimə (s.ə.)"
günləri - Peyğəmbərimizin (s) yadigarı, dünya və axirət xanımlarının
seyyidəsi Həzrət Fatiməyi-Zəhranın (s.ə) şəhadətini əhatə edən
günlərdir. Xanımın (s.ə) şəhadəti ilə bağlı müxtəlif rəvayətlər var.
Amma alimlər tərəfindən iki rəvayət mötəbər hesab edilir. Birincisi -
İslam Peyğəmbərinin (s) dünyadan köçməsindən, yəni hicri 11-ci ilin
səfər ayının 28-dən 75 gün sonra, yəni cəmadiul-əvvəl ayının 13-cü
günüdür. Bu günlərə "Fatiməyi-əvvəl" deyilir. İkinci rəvayətə görə isə
İslam Peyğəmbərinin (s) dünyadan keçməsindən 95 gün sonra, yəni
cəmadius-sani ayının 3-cü günüdür. Ona görə də alimlər bu iki rəvayət
arasındakı 20 günü "Əyyami-Fatimə (s.ə.)" adlandırıblar.
Elə
bu münasibətlə əyyamın ilk günündə İçərişəhər "Cümə" məscidi dini
icması əzadarlıq mərasimlərinə başlayıb. Cəmadiyəl-əvvəl ayının 13-ü,
miladi təqvimi ilə 25 mart 2013-cu il tarixdə başlayan ilk əzadarlıq
məclisi, mərsiyələrin deyilməsi və sinəzənliklə başlayıb.
Sonra
İçərişəhər "Cümə" məscidinin imam-camaatı Hacı İlqar İbrahimoğlu
mərasim iştirakçıları qarşısında xütbə söyləyib. Xütbəsində Hacı İlqar
bu günlərin fəlsəfəsindən, tarixi şəraitindən danışmış, bu günlərin
qorumaq və yaşatmağın gerçək mömin üçün mühüm vəzifə olduğunu
bildirmişdir. O, qeyd edib ki, böyük alimlər tərəfindən bu il bu
günlərin Novruzdan sonraya düşməsini nəzərə alaraq, daha da diqqətli
olmaq vurğulanıb. Xətib qeyd etdi ki, bu günlər 2 ongünlüyü əhatə etdiyi
kimi, bu əyyam elə Aşura dönəmi kimi yaşadılmalıdır.
Hacı
İlqar xütbəsinin davamında zikri-müsibət söyləyərək, Xanımın (s.ə.) son
anlarından, onun İmam Əliyə (ə) son çatdırışlarından və digər mühüm
mətləblərdən danışmışdır. "Bu, bir müsibətdir ki, bizim Zəhracanımızın
(s.ə.) mübarək məzarının harada olması gizlədilib. Burada o dövrün mühüm
mesajları, çatdırışları vardır. Xanım Zəhra (s.ə.) hansısa məişət
məsələrinin qurbanı olmayıb, o, ilahi vilayətin davamçısı olaraq bu
dəyərlər uğrunda şəhadətə yetib.
İslam
ilahi vilayət nuruna bağlantıda olanda gerçək İslam olur. Günümüzdə də
bu bağlantını bizlərdən ayırmaq istəyirlər. Niyə? Çünki insanın ilahi
vilayətdən qırıldıqdan sonra Allahın xüsusi rübubiyyətindən bəhrə
aparması mümkün deyil. Və Xanım (s.ə.) öz həyatında bunun qorunması üçün
canından keçdi. Allahdan istəyirik ki, biz bu ilahi vilayət nuruna
bağlı olanlardan və onu müdafiə edənlərdən olaq", - deyə xütbə zamanı
Hacı İlqar bildirib. Xütbənin sonunda bu mübarək nurun qorunması, bu
bağdan möhkəm yapışılması və digər mühüm hacətlər üçün dualar edilib.
Xütbənin
ardından əyyama həsr edilmiş rövzə deyilib, sonra əzadarlıq edilib.
Builki əyyamın ilk əzadarlıq mərasimi cəmlə "Fərəc" duasının oxunması
ilə yekunlaşıb.
Xatırladaq ki, bu il Əyyami- Fatimə (s.ə) günləri 25 mart -14 aprel tarixinə müvafiq gəlir.
/Deyerler.org/
| 
