 Qum şəhərinin əhalisi ilə izdihamlı görüş! (2010/01/09 - 16:41)
İslam İnqilabının Ali Məqamlı Rəhbəri Həzrət Ayətullah Xamanei bu gün səhər Qum şəhərinin minlərlə sakini ilə görüşündə bu il baş tutan ümumxalq "9 dey” yürüşündə imanlı, uzaqgörən və qeyrətli İran xalqının möhtəşəm və həlledici iştirakını Allahın qüdrətinin təzahürü və İslam İnqilabının tarixində sarsılmaz bir hərəkat adlandıraraq vurğuladı: "Hazırkı qarmaqarışıq və fitnə-fəsadla dolu şəraitdə İslam dövlətinə və İnqilaba qarşı şüarlarla çıxış edən müstəmləkəçilər və dinin əleyhinə olan cərəyanlar illər boyu İmam Xomeyniyə (r.ə) və İnqilaba qarşı mübarizə bayrağı altında birləşmiş şəxslərdir. Bu həqiqəti dərk edən xalqımız isə İslam dövlətinin və İnqilabın müdafiəsində həlledici rola malik olduğunu bir daha sübuta yetirdi”. Həzrət Ayətullah Xamenei 1977-ci il dey ayının 19-da Qum şəhərində baş vermiş möhtəşəm hadisənin çoxcəhətli olmasını qeyd edərək vurğuladı: "Qum əhalisinin 32 il öncə dey ayının 19-da həyata keçirdiyi qiyam uzaqgörənlik, bəsirət, hadisələrə vaxtında reaksiya vermək bacarığı, düşmənini tanımaq, fədakarlıqla əziyyətlərə qatlaşmaq kimi xüsusiyyətləri özündə əks etdirirdi. Bu qiyam İran xalqında böyük təbəddülatın yaranmasına yol açdı və əzəmətli bir hərəkatın təməlini qoydu. Bu möhtəşəm hadisə günü bu gün də özünəməxsus ibrətamiz təsirə malikdir”. Ali Məqamlı Rəhbər insanların iradəsinin və gərgin zəhmətinin tarixdə yaşanmış bəzi günlərin, o cümlədən 1977-ci il 19 dey gününün örnəyə çevrilməsi üçün zəmin rolu oynadığını qeyd edərək dedi: "Bu il dey ayının 9-u da xalqın əzəmətli və fövqəladə hərəkatı nəticəsində tarixə yazılmış günlərdən biridir”. Həzrət Ayətullah Xamenei hazırda cəmiyyətdə qarışıq, qeyri-müəyyən bir atmosferin olduğunu qeyd edərək vurğuladı: "Belə bir şəraitdə xalqın imza atdığı bu hərəkat ikiqat əhəmiyyət daşıyır. Bu hərəkatda həqiqi rəhbərlər olan məsum imamların (ə) və Hüseyn İbn Əlinin (ə) ruhu və mərhum İmam Xomeyninin (r.ə) daim qeyd etdiyi kimi "Tanrının qüdrətinin təzahürü” müşahidə olundu”. İslam İnqilabının Rəhbəri fitnə-fəsad dolu bir şəraitdə işlərin çətinləşdiyini, kimin kim olduğunu, dostla düşməni ayırd etməyin asan olmadığını qeyd etdi. O, Siffeyn döyüşündə İmam Əliyə (ə) qarşı vuruşanların etdiyi fitnəkarlıqları açıqlayaraq əlavə etdi: "Belə ağır və dolaşıq bir şəraitdə İmam Əlinin (ə) sadiq və ayrılmaz silahdaşlarından biri olan cənab Əmmar Yasir tərəddüd içərisində olan döyüşçüləri maarifləndirməyə və həqiqəti onlar üçün açıqlamağa başladı. O, bu döyüşə şübhə və tərəddüdlə yanaşanlara başa salırdı ki, vaxtilə Allahın Rəsuluna (s) qarşı mübarizə aparanlarla bu gün Əmirəl-mömininə (ə) qarşı cəbhədə birləşənlər arasında heç bir fərq yoxdur. Fərq yalnız bundadır ki, Əliyə (ə) qarşı döyüşənlər zahirdə müsəlman olduqlarını, Quranın və peyğəmbərin tərəfində olduqlarını iddia edirdilər”. Həzrət Ayətullah Xamenei bunları da qeyd etdi: "Sizcə hələ ölkədə prezident seçkiləri start götürməmişdən bu günə qədər Amerika, İngiltərə və sionist xəbər agentlikləri hansı mövqedə durublar? Tudəçilər, çevriliş tərəfdarları kimi dinə qarşı çıxan cinahlar, İslam inqilabının və İmam Xomeyninin (r.ə) digər əleyhdarları harada olublar? İslam dövlətinə qarşı mübarizə bayrağı altında birləşməyiblərmi? Cəbhələşmədə heç bir dəyişiklik baş verməyib və bu olduqca mühüm olan bir əlamət və göstəricidir”. Həzrət Ayətullah Xamenei 9 dey günü baş vermiş böyük tarixi hadisəni xalqın müdrikliyinin və ayıq-sayıqlığının, bu olduqca əhəmiyyətli göstəricini yaxşı dərk etməsinin nəticəsi olduğunu qeyd edərək əlavə etdi: "Xalqımızın ayıq-sayıqlığı kimi bir ilahi nemətə görə yüz dəfələrlə şükür səcdəsi yerinə yetirilsə belə, yenə də azdır!”
| 
